ADDA manen baro a kontrobersiya ti pimmutok a kasla bulkan itay kallabes. Daytoy ti OPLAN-TAMBAY! IBP, CHR, Mammanday-linteg ken dadduma pay a grupo ti kimmontra ti takderda. Ngem sakbay nga intay iludeg-ludek ti isyu, maipalagip nga ti makagapu no apay nga ipatpatungpal ti kapulisan ti nasao nga addang ket ti pagayatan ni Pres. Duterte a siguden a pengdan dagiti mabalin a pagtaudan dagiti dumteng pay a krimen.
Maysa dita a punto ket dagiti krimen a napaspasamak kadagiti kallabes a gappuanan dagiti naka-istambay kadagiti lansangan. Dita a nayanak ti nakuna nga addang ti PNP iti sapasap a pagilian. Nagbunga daytoy iti pannakaaresto iti adu a tambay. Dita met a nagkutak dagiti maseknan a mangkuweskuestiyon iti legaledad ti nakuna nga addang wenno oplan. Ngem sakbay man nga intay kalien ti kaunggan daytoy nga isyu...intay man biit pasadaan dagiti sumangka-kontrobersiya a paspasamak ditoy pagilian itay kallabes ken agdama:
***
Addan sa manen round-2 iti Digong vs. Leila de Lima tension. Nagkutak ngamin ni Leila, kuna ti report kontra iti agek ni Digong iti OFW idiay Korea. Nagbuelta met ni Digong: amangan kano ta ibutaktakna met ti "sex-video" ni senadora ken ti "kabitna" a naibutaktak idi maisaangda iti imbestigasyon idiay Kongreso panggep iti illegal a droga. Sapay koma ta din dumegdeg ti nakuna a kontrobersiya amangan ta adu pay dagiti napapateg a parikut ditoy pagilian ti malibtawan a maatindaran.
***
Bimtaken ti pinal a pangeddeng ti Korte Suprema iti apela ni sigud a Chief Justice Maria Lourdes Sereno babaen iti butos nga otso-sais (8-6) a nangpasingked iti immunan a pangeddeng ti SC iti "quo warranto petition" kontra iti CJ. Iti ababa a pannarita – awan merito kano ti apela ni Sereno isu a pinalen ti pannakaikkatna kas Chief Justice. Ngem adda kano met basnot ti kampo ni Sereno: "di pay kano nalpas ti laban".
Hehe...kayatna a sawen...adu pay dagiti mabalin a mapasamak a mangibunga iti adu pay a pakasaritaan ditoy pagilian. Surotentayo dagita nga eksena nangruna ta adun dagiti immangkas ken nagkalumbitin iti daytoy nga isyu kontra iti administrasyon nangruna ta umadanin ti 2019 election. Tsk tsk..kasla masirsiripmin dagiti nabaranto a tinnabbaawan iti kampanya. Masiguromi a maysanto kadagiti starring iti entablado ket ni Madam Sereno. Adda karbenganna.
***
Pimmutok met ti kontrobersiya panggep iti "random drug test" kadagiti estudyante. Immunan a timmubngar dita ni Dep-ed Sec. Briones. Amangan kano ta makaapekto daytoy iti panagadal dagiti estudyante ken mabalin kano a mangmantsa iti imahe ti pagadalan.
Ngem saan met a nagsardeng dita dagiti mangiruprupir iti kinapudno nga adda dagiti reports (surveys) a mangipakpakita nga adu kadagiti menor de edad (estudyante) ti naduptalanda nga agar-aramaten iti droga. Gapu iti daytoy, immunan a nangipakat iti ngipen ti ordinansada ti siyudad ti Quezon nga uray agtubngar dagiti nagannak, ituloyda latta ti random drug test.
Mailemmeng ti kinasiasino dagiti agpositibo ken mairekomenda dagitoy iti akreditado a doctor ti DOH tapno maammuan ti dependency level ti estudyante. Sabagay, napintas ti gannuat. Adda kinapudnona nga adun kadagiti menor de edad ti agar-aramat ken maar-aramat iti linya ti illegal a droga. Banag a di rumbeng a mayaleng-aleng.
***
Panagarmas dagiti papadi, preachers....nabusisi kalpasan iti pannakapapatay iti tallo a papadi ken pannakasugat ti maysa itay nabiit. Nupay adda anunsiyo manipud CBCP a saanda a pabor iti daytoy a plano...adda 246 a papadi, ministro ken preachers manipud nadumaduma a relihiyon ti naireport a nagaplayen iti PNP tapno makaawitda iti armasda sadinoman iti ayanda kas seguridad dagitoy. Iti napalabas a press briefing nga inaramid ni PNP Chief Oscar Albayalde...iti pakabuklan a 246 a lideres iti relihiyon, adda 188 ti papadi ti Katoliko, 58 manipud iti grupo dagiti ministro, papastor ken preachers manipud nagduduma a dominasyon.
Innayon pay ti PNP nga adda kadakuada (papadi) ti siguden a nagaplikar iti panagimet iti armas ngem kaadduan kadakuada ti baro nga aplikante. Kinuna pay ni P/Director General Oscar Albayalde a magna dagiti aplikante iti umno a proseso ti PNP-FEO sakbay a maipaayanda iti karbengan ken kalintegan nga agimet iti armas.
"We are amenable to taking the extra step of providing firearms proficiency and marksmanship training to religious leaders who wish to own and possess firearms," innayon pay ni Albayalde. Arasaas: sapay koma ta no mangmisada ket saan a sumirsirip ti putan ti paltogda! Hehe...joke lang.
***
Surprise inspection kadagiti presinto ti kapulisan, immani iti positibo nangruna iti NCR. Adun dagiti naikkat iti puwesto ken nadusa a pulis gapu iti pannakaduptal kadagitoy a nakaturog, saan a nakauniporme, narugit a presinto, nagabandonar iti takemna ken agar-aramat iti celfon bayat iti oras ti trabahoda ken dadduma pay a violations.
Kaudian a nasampelan ket ti pannakaikkatna iti puwesto iti dua a precinct commanders ken uppat pay a pulis ti Northern Police district. Sapasap metten a pagilian ti nakaipakatan ti nakuna a PNP surprise inspection. Itay laeng kallabes, adda pay babae a pulis ti nabuko nga agur-urok. Adda met tay opisyal a naglibas ngem nabatina met ti armas ken ramitna. Nakababain ngem..kasapulan nga ipakita dagiti adda iti kapulisan nga isuda ti sanggir dagiti umili saan a dagiti umili ti pagsanggiranda nangruna iti isyu ti kotong.
***
Immarangkadan ti Oplan-Balik-Tikas iti sapasap a pagilian. Daytoy ti maysa kadagiti baro nga addang ti PNP tapno ad-adda a mapagtalkan ken mapangnamnamaan dagiti kameng ti pulisya. Adu ngamin dagiti eksena idi naigannuat ti Oplan-tambay, limtuad dita dagiti nagdadakkel a boksit dagiti sumagmamano nga otoridad nga arig saan a makataray a kumamat kadagiti suspects.
Hehe...malagipko pay ti nakuna daydi lolok: uray saan a nataer wenno nataraki ti maysa a pulis no mayat ti takderna no nakauniporme...adu ti kumpet a babbae, este, agtamed ken mangrespeto nangruna kadagiti babbae. No dikan makita ti tumengmo gapu iti timmabungaw a pusegmo, agkutikan amangan ta awan mayat a makisala kenka iti kabaret. Saan laeng a dayta ti kantiyaw ni lolok idi: no butyoganka a sigud met a saan, amangan ta atapendaka a dakkel ti delihensiyam. Isu a mayat no adda tay body mass index examination a regular para kadagiti pulis, saan aya? Kuldit: no tumaerti takder dagiti otoridad...amangan kano ta adu kadagiti mimisisda agbanag a selosa ken suspetsosa. Ahm makaammodan.
***
Subliantayo man pards tay isyu ti tambay. Adda dagiti legal a luminaryo ti nagkuna a maikaniwas iti linteg no saan a naannad ti pannakaipatungpal ti Oplan-tambay. Malabsing ti linteg para iti karbengan dagiti maatap. Kuna dagiti analysts: saan a dakes ti agtambay iti maysa a disso. Karbengan ti siasinoman dayta.
Kuna met dagiti otoridad, saan a maaresto dagiti tambay nga awan inaramidna a krimen wenno panaglabsing kadagiti ordinansa kas koma iti panaginum iti arak iti ruar ti pasdek, awan akinngato a bado, nakainum a nangiwat ken manggulgulo ken kaarngi nga aramid. Dayta ti kaibatogan ti kayat ni Pres. Duterte a mapasamak. Saan a basta nakaistambay ket maaresto no di ketdi depende no adda linabsingna a linteg. Nagduduma ngamin dagiti rasones no apay nga adda agtamtambay, kunada. Saan a kumo nakatambayka ket addan planom a krimen.
Dita a masidir ken matimbang ti kapabilidad dagiti otoridad a mangipatungpal iti nakuna a pammilin. Kunada ngarud: tay sobra, kaltasan...tay kurang nayunam.
Ngem ti kapintasan nga aramiden koma ti gobyerno: tulonganda koma a maaddaan iti panggedan dagiti tambay tapno awanen ti parikut.
Amen! Adios mi amor, ciao, mabalos!
