ITAY laeng kallikud a lawas...nauray met laeng dagiti umili ti nabayagen a natagiuray: ti pannakapirma ti linteg a mangisanud iti eleksiyon para barangay ken SK.
Adu ngamin ti nagdanag. Limsut ngaminen iti Kamara ken Senado ti bill a mangitantantan iti nakuna nga eleksiyon. Ngem gapu ngata iti kinaadu dagiti pakakumikoman ni Pres. Duterte...naitantan ti pannakapasingked ti bill tapno agbalin a linteg. Ngem nauraytayo met laeng.
Ngem ala, tapno mas malawlawagan dagiti an-anek-ek...intay sukayen dagiti linabag ti nakuna a pannakaitantan ti Barangay/ Sangguniang Kabataan election.
-o0o-
Idi napan a a tawen a rumbeng koma a maangay ti Barangay/SK election ngem naitantan. Ita koma nga Oktubre 23, 2017 ti eleksiyon ngem insanud manen ni Digong. Maangayto daytoy inton Mayo 14, 2018. Ngem apay? Nauneg dagiti rason ni Presidente Duterte: adda atapna a maaramat ti drug money babaen kadagiti agkandidato a kakutsaba dagiti adda iti illegal a drug trade ditoy pagilian.
No intay sonaen dagiti reports... 60 porsiyento kadagiti barangay chiefs ti agnomnomar iti drug money wenno pirak manipud iti illegal a droga. Kuna ti report nga adu kadagiti opisyales ti barangay ti protector dagiti drug syndicates. Ket tapno saan a maaramat iti kampanya ti kuwarta manipud droga... itantan laengen ti eleksiyon. Saludsod ti kaadduan... saanna ngata nga apektaran ti sumaganad nga aleksiyon inton 2019? No comment kami iti dayta a banag... ngem adu ti agdandanag.
-o0o-
Base pay laeng kadagiti reports, 80 porsiyento kadagiti barangay iti entero a pagilian ti drug infested. Nagrairan ti droga nangruna kadagiti nasusulinek a disso.
Kinapudnona, kaadduan kadagiti napatpatay a drug pushers ket nagtaud kadagiti nakukurapay a barangay. A kuna met dagiti analyst...apay kano a dagiti nakukurapay wenno babassit a sida ti mapadpadso idinto ta dagiti dadakkel a lames ket agtultuloy met kano ti negosyoda iti droga? Maysa pay a saludsod a narigat nga isapulan iti sungbat ket: iti kinapinget ken kinainget ti kampanya ti gobyerno kontra droga...apay nga adu latta dagiti pushers ken ushers? Kasla saan a maib-ibus ti droga iti amin a suli. Ken apay a kasla dida agamak iti dagsen ti dusa. Didan kabuteng ti linteg ken adun a pangta wenno ballag ti gobyerno panggep iti illegal a droga.
Kinapudnona, adun a barangay chairman ti napapatay gapu iti droga. Ngem apay nga agtultuloy latta ti illegal nga aramid kadagiti barangays? Saan aya nga adda laeng kadagiti barbarangay dagiti drug den ken laboratory? Adda pay dagiti report ti kapulisan nga adda dagiti raid a naisayangkat ket kadagiti pay balay a mismo ti barangay chairman ti nagbalin a repacking center ti shabu? Adda pay dagiti otoridad a naaktuan a karaman iti illegal nga aramid. Dayta ti dakkel a parikut iti droga kadagiti barangays.
Isu, kas kuna ti kaadduan... adda nadagsen a rason no apay nga insanud ni Digong ti eleksiyon pang-barangay.
-o0o-
Suhestiyon: saan laeng koma kano a maitudo ken mariput dagiti tattao (babassit ken dadakkel) nga addaan kanaig iti illegal a droga. Rumbeng met koma a masentro no sadino ti pagtataudan dagita a droga. Dinto agsardeng ti supply ti droga kadagiti barangay agingga iti di maputed ti pagtataudanna nangruna iti shabu. No maburak ti source... awanen ti mainegosyo pay dagiti anay a barangay officials, saan aya? Saan laeng a ti serbisyo pam-barangay ti maasikaso ken maitandudo no di ketdi addanton ti pondasyon para iti panagrang-ay, panagkaykaysa ken talna ken kapia. Dagita koma a suhestiyon ti ibaklay ti gobyerno bayat ti pannakaipakpakat pay laeng ti kampanya ti kapulisan kontra droga. Ramot ti rumbeng a maputed tapno matay metten ti sibubukel a kayo. Malagipko manen daydi lolok: Pinuoranna ti narasbok a kawayan ta payonganna kanon dagiti mulana. Ngem nagbiag latta ti kawayan ta adda pay laeng ti ramutna. Ginaburanna iti adu a garami ken ruot sana binuyatan iti sangalata a gasolina. Siniggiyabanna. Ayos ni lolok. Nauram ti kawayan agraman Kalapawna pati nuangna, Nalitson! Sapay koma ta saan a kasta ti pagtinnaganto ti kampanya kontra droga. No sinno dagiti pudpudno a suspetsa, isuda ti pagsungbaten iti linteg. Iti kasta, mapunasto metten ti EJK wenno extra judicial killings. Amen.
-o0o-
Subliantayo ti barangay eleksiyon. Kayatna a sawen...agtalinaed pay iti akemda dagiti amin nga opisyales ti barangay agingga inton Hunyo, 2018. Kasanon dagiti rinuker ta hold-over dagitoy wenno saanda met a masuktan iti agdama?
Dayta ita ti dakkel a reponsibilidad ti gobyerno ken bumarangay. Rumbeng a mamonitor ti aramid dagiti sadot ken kurakot nga opisyal. No agtultuloyda iti illegal nga aramidda, rumbeng a masaklangan iti kaso ken madusa sakbay iti eleksiyon inton Mayo 14, 2018. Ita pay laeng, masapul a makuttoanen ti ranggo dagiti agdama nga opisyales ti barangay ken uray pay kadagiti masisiimtayo a tumapogto iti pulitika.
Ket kadagiti met nadalus ti panagakemda...adda pay makatawen manen nga inkay itultuloy ti husto a serbisyoyo tapno mas natibtibkerton ti sammakedyo inton eleksiyon-2018.
Daytoyen ti panawen ti panagdalus ken panangipakita a serbisyo iti kaadduan ti puntiryayo saan a serbisyoyo iti bukodyo a bulsa ken mudos operandi.
-o0o-
Subliantayo manen ti isyu ti droga kadagiti barangay. Adu a barangay ti nairekord a drug infested. Kadagiti naglabas a panawen sipud immarangkada ti oplan tokhang...awan nainaganan kadagiti barangay chairman ken nagan ti barangay.
Ania ti inaramid ti gobyerno nga addang tapno madalusan dagita a barangay? Ania ti napasamak kadagiti naitudo wenno nasuspetsa nga opisyal? Adda kadin nadusa? Kaawatan kadi nga inton May 14, 2018 ket drug free aminen a barangay ti pagilian? Awanto ngatan dagiti umok ti droga? Nakaseldanto ngata aminen dagiti bulok nga opisyal? Awanto ngatan ti rason tapno isanudto manen ni Pres. Duterte ti eleksiyon? Daplis met dagiti sutil: iti laeng kadi pambarangay nga eleksiyon ti mabalin a pakaaramatan iti drug money? Saan ngata a kastanto met laeng iti mapagpadaanan a national election? Awanto ngata kadagiti local ken national candidates ti igastuan wenno tulongan dagiti sindikato ti droga? No saan a maatipa ti narugit a sestema wenno ti makunkuna a narco-politics.... addanto pay ngata nadalus nga eleksiyon? No kaskasdi a narugit... apay kano a kasapulan pay laeng ti eleksiyon? Ngem no awan eleksiyon, kasanotayon a makapili kadagiti agsirbi ditoy pagilian? Tsk tsk... piman a Pilipinas.
Ti la adda ditan a pagparparikutantayo. Ti banglesna, agsusubang pay dagiti agtuturay. No sisibiag daydi lolok, maymaysa laeng ti maibagana a solusyon dagita a parikut: mapantayon idiay Mars wenno Bulan! Ngek!
Please share your experience with LOLO DORO “Jimmy Luzano” aka Mr. Cariñoso as we celebrate 50 years in the industry.
Send at 0928-506-5269. Thank you, Adios mi amor... ciao, mabalos!
