GIINGONG resbak ang usa sa mga motibo nga nakita sa otoridad human gidunggab ang usa ka menor de edad sa ganghaan sa tunghaan nga nahimutang sa Calaanan, Canitoan, Cagayan de Oro.
Si Jhon (dili tinuod nga ngalan), 15, tinun-an sa senior high school ug residente sa Balite Drive, Calaanan, Canitoan samtang ang responsable usa ka alyas "Jeckoy", kinsa giingong usa ka grade 11 sa susama nga eskwelahan.
Sa pakighinabi sa VoxPop Supervoxpop kang Police Major Evan Viñas, tigpamaba sa Cagayan de Oro Police Office (Cocpo) gibutyag nga giingong dunay panagbingkil kaniadto si John ug ang igsoon ni Jeckoy rason nga nibalos kini.
"Dunay grudge daan. Previous naka engkwentro kuno ning igsoon aning responsable kining biktima. Naa silay grudge kato iyang igsoon sa nilabay nga panahon. Resbak ang giingon nila," matud ni Viñas.
Nasayran usab nga nakaangkon og tulo ka mga samad dinunggaban sa likod nga bahin ni John, kinsa daling gidala sa J.R Borja Hospital, human gidunggab gamit ang icepick. Samtang anaa sa ganghaan sa maong tunghaan, dali nga nisibat ang suspek.
Gibutyag usab ni Police Captain Jason Sto. Domingo, hepe sa Police Station 7 sa Bulua, nga luwas ra sa kakuyaw nga kahimtang ang biktima kinsa padayong nagpaalim sa ospital.
Padayon pa ang kapulisan sa follow-up operation sa pagsulat niini nga balita.
