TEMPORARYO nga gipasirado niadtong Dominggo, Marso 22, sa Regulatory Compliance Board (RCB) uban ang kapulisan sa Cagayan de Oro City Police Office (Cocpo) ang mga tindahan nga dili kaayo mga kinahanglanon ang baligya labi sa Cogon public market.
Kini kalabot na usab sa gipagawas nga executive order (EO) ni Mayor Oscar Moreno nga EO 048-2020 ug 049-2020 aron pagpakgang sa coronavirus disease (Covid-19).
Gibutyag ni Antonio Resma Jr., inspectorate team leader, nga kini nga mga tindahan nagbaligya og mga dili kaayo kinahanglanon.
Nagpasalamat usab si Resma tungod kay nakasabot usab ang mga vendors ug boluntaryo na nga nagsira sa ilang mga tindahan.
"Wala. Pasalamat ta sa kooperasyon ug pagsabot sa atong mga vendors ug sa CEED ug kay Kag Ian Mark Nacaya kay maayo kaayo ang atong relasyon sa mga stall owners," matud ni Resma.
Anaa sa 168 ka mga non-essential stores ang temporaryong gipasara sama sa 24 ka mga parlor, 2 ka baeran, 17 ka tailoring ug prime rentable anaa sa 125 kini gikan sa City Economic Enterprise Department (CEED).
Kahinumduman nga sirado na ang mga mall sa siyudad gawas lamang sa supermarkets ug pharmacy.
