DUHA ka mga nadugang nga nagpositibo sa Covid-19 sa Northern Mindanao ang pulos nakabsan sa kinabuhi.
Kini ang gikumpirma ni Dr. Adriano Suba-an, ang regional director sa Department of Health (DOH) Northern Mindanao atol sa NorthMin Task Force for Covid-19 Online Press conference uban ang mga nagkadaiyang cluster heads sa task force.
Matud niini nga ang NorthMin nagtala na og lima ka positibo sa Covid-19 samtang napulo (10) ang captured positive cases gikan sa laing rehiyon nga dinhi sa NorthMin gikuha ang swab test.
Adlawng Biyernes, Abril 3 gipahibalo ni Suba-an nga ang unang nagpositibo, usa ka 42-anyos nga lalaki, nagikan sa Iligan City ug adunay close contact sa nagpositibo sa Covid-19. Gi-admit kini niadtong Marso 22, gumikan sa grabeng ubo, hilanat ug sip-on. Namatay kini niadtong Marso 28.
Ang ikaduhang kaso nga gikonsiderang captured cases ang usa ka 50-anyos nga taga Bubong Lanao del Sur, kinsa aduna gihapon close contact sa nagpositibo sa Covid-19. Gi-admit kini niadtong Marso 22, 2020 gumikan sa grabeng reklamo niini sa ubo, sakit sa ulo, ug galisod sa paginhawa hinungdan susamang adlaw nakabsan sa kinabuhi.
"I am enjoining those Covid-19 positive cases to come out voluntarily and encourage their close contacts to approach our health personnel for medical assesment and proper management," hangyo kini ni Suba-an aron dili na motakod takod pa ang sakit.
Mapasaligon si Suba-an sa mga nagbaton niini nga sakit nga itago ang identipikasyon.
Gipahibalo sab niini nga ang Northern Mindanao Medical Center nga nahimutang sa dakbayan sa Cagayan de Oro ang Apex o gikonsiderang Ligtas Covid-19 hospital.
Lakip na niini ang MHARMC sa Misamis Occidental ug Amai Pakpak Medical Center sa Lanao del Norte ang gikonsiderang mahimong maadmit ang mga grabe og kaso nga mga person under investigation o kadtong nagbaton og severe acute respiratory infection (Sari) patient.
Samtang gipahibalo sab ni Suba-an nga adunay 131 ka gikonsiderang isolation units sa Northeastern Mindanao alang sa mga PUIs nga adunay mga mild symptoms.
"The Northmin Task Force for Covid-19 through its ten task groups has sprung into action responding to the needs of contituents. We will continue to do so as we are ready ourselves to the possible rising of Covid-19 cases in the days to come," matud ni Suba-an.
