MGA 28 ka samad ang naangkon sa usa ka babaye human giluba sa iyang kanhi uyab niadtong Septiyembre 7 sa Julio Pacana street, Cagayan de Oro.
Priso si Jerson Laihel, 44, house boy, ulitawo, lumad sa Barangay Carmen. Samtang ang biktima naila nga si "Naome" (bansagon gitago), 24, housemaid, taga Barangay Puntod.
Sa pakighinabi kang Police Executive Master Sergeant Terencio Virtudazo, Police Community Relation (PCR) sa Police Station 5 (PS5) sa Macabalan, gibutyag nga nag-unang hinungdan mao ang selos ilabi na nga makigbulag na ang babaye.
Ang suspek migamit og ice pick ug gabas sa pagpanunggab.
"Ang hinungdan is love triangle. Kay matud pa, naa kuno silay relasiyon sa biktima. So, mao lage na nga sakit pud kay minyo man ang babaye. Nasuko lage siya nga bulagan. Mao to nga puslan man lugar, iya nalang kunong patyon aron tabla na lugar sila," matud ni Virtudazo.
Samtang aminado usab si Laihel nga nagselos siya sa drayber kay sige kini og uban.
"Nagselos rako, pero wala ko nasuko nga maadto siya sa lain kay minyo man na siya. Oo, tinuod uyab mi. Nagselos ko sa drayber, dili sa iyang bana," matud ni Laihee.
Gidugang pa nga iya lang kini nga gipaningil sa hulam, ilabi na nga makigbulag na kini kaniya.
"Iya kung bulagan. Unya, sige magbulag ta. Unya katong kwarta nga gibaylo nimo sa ako, akong kuhaon. Iya man ko gibunalan. Nasakitan ko. Mura ko'g naalimungawan. Wala nako kabalo kapila nako gidunggab," dugang pa.
Ang babaye kritikal karong panahona.
Ang suspek ang kasamtangang nagtingkagol sa bilanggoan sa PS5 kinsa posibleng mag-atubang sa kasong frustrated murder.
