PWEDENG mo dakop ang mga barangay tanod labina niadtong ilang makita nga adunay mga tindahan sa ilang tagsa-tagsa ka mga barangay nga namaligya ug ilegal nga mga pabuto.
Kini ang gikumpirma ni Police Lieutenant Colonel Mardy Hortillosa, tigpamaba sa Police Regional Office-Northern Mindanao, ug sakop sa Task Force Firecrackers nga hugot ang ilang koordinasyon sa mga barangay tanod labina nga dili tanan pulis maka kober ug makabantay sa matag barangay.
Dugang niini nga hinungdan nga labihan ang ilang paningkamot nga ang retailer ug dealer pa lang daan ila na kumpiskahon aron dili kini makalusot sa mga barangay.
Apan kung ugaling adunay makalusot man sa matag barangay, ilang gitahasan ang mga barangay tanod sa pagpangdakop niini.
"Yes, pwede silang modakop diha sa barangay ug makita nila nga bawal nga pabuto ang gibaligya sa tindahan," matud ni Hortillosa.
Sa iyang bahin ni Department of the Interior and Local Government (DILG) City Director Jane Doncallos nga kung kaniadto ang Judas belt wala gidili, karon lakip na kini sa gidili ug gilantaw ang gibug-aton sa pulbora.
"Daghan kaayo firecrackers nga gibawal nato karon ug atong gisusi niini ang gidaghanon sa pulbora. Kay kada tuig kung ibawal kana nga pangalan, maghimo og laing pangalan ang manufacturer," matud ni Doncallos.
Gihingusgan sa task force nga mas maayong fireworks ang gamiton ug mga naandan nga torotot ug uban pa aron malinawon, luwas ang kasaulogan sa pasko ug bag-ong tuig.
