USA ka café nga gitay-og sa linog ang maoy gipahimuslan nga gi tulis.
Mga alas 9:40 sa gabii, Lunes, Nobiyembre 18, gitulis ang Craftyline Café sa 9th-16th St., Barangay Nazareth, dakbayan sa Cagayan de Oro.
Tiklo ang suspek nga giila sa kapulisan nga si Noemir David, alyas "Lolong", 24, minyo, taga Block 3, District 6, Barangay Puntod, ning dakbayan.
Sa impormasiyon gikan sa kapulisan sa Police Station 9 (PS9) ubos kang Police Major Ericson Sabanal, gibutyag nga nasutang nalambigit sa ginadiling druga ang suspek.
"Iyang magulang ani gipatay last two years involved sa shabu-ga. Shabu gihapon ni ang suspect,' matud ni Sabanal.
Nasayran nga bisan pa man nga naglinog, nakahigayon pa sa pagpanulis ang suspek.
Apan, wala gihapon usab kini nakaikyas sa kapulisan human nga wala nagpatarog sa nasinatiang pagtay-og ug nagpadayon asa ilang operasiyon hinungdan nga nasikop ang suspek pinaagi sa hot pursuit operation human nga nasubay kini tungod sa global positioning system (GPS) sa kinawat nga cellular phone nga maoy nagtudlo sa nahimutangan niini.
Usa sa mga silingan ang naghatag og identipikasiyon sa suspek rason nga gipangita kini pinaagi usab sa social media account rason sa pagkasikop.
Narekober gikan sa suspek ang mga butang ug na-uli na sa tag-iya nga si Justice Bronola y Lauderes, 23, nga taga Zone 10, Upper Carmen sama sa: usa ka Chanel bag nga kolor itom nga dunay sulod nga usa ka iPhone 6, usa ka iPhone 6 Plus, usa ka pocket wifi, white gold bracelet nga tag P5,000, driver's license ug uban pa nga mga ID's, ug cheque nga P1,700 gawas lang sa kwarta nga P4,500.
Narekober usab ang usa ka kolor blue nga polo shirt nga dunay printang USA Polo nga gituohang gisul-ob sa suspek atol sa pagpanulis.
Ang suspek ang nagtingkagol na sa mini-cell sa PS9 alang sa pagpasaka og tukmang kaso.
