MOPALIT og laing duha ka mga thermal scanner ang dakbayan sa Cagayan de Oro sa pagpangandam sa pag-abot sa panahon nga hinay-hinay na nga mabuksan sa pagbalik ang mga pantalan, terminal ug bisan ang Laguindingan airport.
Gibutyag ni Mayor Oscar Moreno nga ang moabot gyud ang panahon nga balik na sa operasiyon ang mga pantalan, terminal ug bisan ang airport diin gilaoman ang pagdagsa sa mga magbiyahe rason nga plano niini nga dugangan og laing duha ka mga thermal scanner apan giingong dili usab kini basta-basta lang nga buksan ug kinahanglan gyud og mga pagtuon ug planuhon pag-ayo.
"I totally understand nga moabot gyud ang panahon nga moabot na ang mga barko probably in half capacity or basta naay mga guidelines diha naay safeguards," matud ni Moreno.
Gibutyag niini nga sa panahon nga mag-operate na kining mga dapit sama sa pantalan sa Macabalan, bus terminal sa Bulua, ug Agora ug bisan sa Laguindingan Airport kinahanglan na kaayo kining maong thermal scanner alang na usab sa new normal.
Gani nagpadala kaniya og sulat ang kadagkoan sa Philippine Port Authority (PPA) ug nakasangpit matud kalabot na sa thermal scanner.
"Yesterday, I already authorized that we buy two more thermal scanners. Mopalit pa ta og thermal scanners kay ang advantage ani nga thermal scanner is dili na nimo kanang pistola , kanang thermal gun isa-isahon ,mano mano. Kani siya molabay ka lang makuhaan kana niya og temperature and then ang makina na mismo ang mo-signal sa operator nga kana siya naa'y fever and ang accuracy ani is very very high," matud ni Moreno.
Nasayran nga duna nay gipalit nga duha ka mga thermal scanner ang siyudad nga gikan sa Ireland nga nagkantidad og kapin sa P2 milyones.
Una na usab nga gipasabot ni Dr. William Bernardo, logistics cluster nga ang maong klase sa thermal scanner dunay brand nga Satir ug daghan og function ug feature sama sa facial recognition, ug posibleng maka-identify sa edad, pangalan ug gender nga mabutang sa database kini human nga daghan ang nag-kwestiyon sa kantidad sa maong unang napalit nga mga scanner.
Daghan usab matud kini og mga kaubang ekipo sama sa thermal camera, black body, tripod, Samsung LED TV software program, ug uban pa.
Kasamtangang anaa sulod sa merkado ang maong duha ka mga thermal scanner nga una na nga napalit sa siyudad diin usa sa mga lakang nga mabatokan ang makamatay nga Covid-19.
