NEGATIBO ang resulta sa rapid diagnostic test (RDT) ni Misamis Oriental Gobernador Yevgeny Bambi Emano ug Task Force for Covid-19 Chief Dr. Jerie Calingasan Lunes, Hulyo 27, 2020.
Apan gipailalom pa gihapon ang duha ka opisyal sa reverse transcription-polymerase chain reaction (RT-PCR) test ug kasamtangan pang gipaabot ang mga resulta niini.
Kini human nagpositibo sa coronavirus disease (Covid-19) ang usa ka empleyado sa Kapitolyo ug ang duha ka anak sa usa usab ka empleyado.
Matud ni Emano, usa siya sa secondary contact sa mga ingon nga empleyado.
"We have an employee whose son tested for positive at first. And iyang anak nag-positive. Pag-positive sa iyang anak, ang iyang pamilya gi-RDT diretso. Pag-RDT sa iyang pamilya, nakit-an nga ang iyang isa ka anak na nurse nag-positive," ingon ni Emano.
"Lima sila sa pamilya. Duha nag-positive, tulo ang nag-negative," dugang niini.
Ang empleyado, kinsa karon gi-isolate kauban sa iyang pamilya, usa ka "very instrumental" nga tawo sa Provincial Government.
"Ang problema, now that she is isolated, we are having actually challenges," matud ni Emano.
Ang usa ka empleyado nga nagpositibo naa pud karon sa usa ka isolation facility, ingon ni Emano.
Sa pagkakaron, ang Misamis Oriental naay 54 nga kumpiramdong kaso sa Covid-19, diin 36 ang active cases, 17 recoveries ug usa nga namatay.
