WALA pa gidawat ni Kongresman Rolando "Klarex" Uy ang pag-endorso ni Mayor Oscar Moreno hangtod karong panahona human sa ikapilang higayon gi-endorso isip mayor sa dakbayan sa Cagayan de Oro alang sa tuig 2020 nga piliay.
Gibutyag ni Uy nga dako ang pasalamat niini ug garbo usab ang pag-endorso ni Moreno kaniya kay gani ang uban mao paman ang maghangyo nga ma-endorso, apan kini nakurat nalang sa mga pahayag ni Moreno nga buot niini maoy mosunod ug mopadayon sa iyang mga programa.
Nagpasalamat usab kini sa pagsalig nga gihatag kaniya ni Moreno.
Nasayran nga sa ikapilang higayon na kini gi-endorso ni Moreno diha sa iyang mga pahayag.
"Mipasalamat lang ko. Mipahiyom lang ko pero hangtod karon, wala pa nako gidawat ang maong pag-endosar kay di man ko mag-decision nga ako ako ra," matud ni Uy.
Gidugang pa nga kinahanglan pa niini nga istortyahon ang iyang pamilya ug kauban sa politika kalabot niini.
"Kinahanglan magdesisyon nga dunay panagsabot sa akong pamilya nga dili lang sa akong pamilya, pero mismo usab sa akong mga kauban sa politika. Duna pa silay ipangutana konsultasiyon nga matagaan pud nako silag bili nga bation nako nga kauban," dugang pa.
Dako usab ang pasalamat niini kang Moreno ug garbo niini nga gi-endorso sa kasamtangang administrasiyon.
"Tingali human sa aning Pasko, moabot raman gyud aning tanan paabuton lang kung inig abot anang higayona tingali masayran na sa tanan," dugang pa.
