BALHOG sa prisohan ang upat sa lima ka mga tinun-an human giakusahan nga nag-gang rape ug nag-video sa usa ka 23 anyos nga babaye human nangahubog niadtong Agusto 6 sa Julio Pacana Street, Cagayan de Oro.
Ang mga suspetsado pulos tinun-an sa kolehiyo nga gitago una ang mga pangalan. Usa niini nag-edad og 21 anyos nga Bachelor of Science (BS) in Business Administration, usa ka 18 anyos nga BS Criminology, usa ka 17 anyos, ug usa ka 24 anyos.
Ang 23 anyos nga dalaga usa sab ka kolehiyala nga taga Barangay Lapasan.
Nasayran nga uban og inom ang mga suspek ug ang dalaga tungod kay dunay birthday.
Sa inisyal nga imbestigasyon, giingong usa ka concerned citizen ang nakadungog sa hilak ug singgit sa babaye hinungdan nga gitaho kini sa kapulisan.
Sa paghinabi sa VoxPop Supervoxpop, gibutyag sa 21 anyos nga suspek nga nakahilabot siya sa dalaga tungod sa kahubog ug natintal siya.
"Birthday nako, ang biktima mao to ulahig abot. Nahubog na ang biktima. Pagkahubog nagsayaw-sayaw dayon siya kay birthday gift lage daw," butyag sa 21 anyos.
Gidugang pa niini nga natintal siya sa ka sexy sa dalaga nga nagsayaw-sayaw sa ilang atubangan. Nangayo usab kini og pasaylo sa nahimo tungod sa kahubog human usab nahilabtan ang babaye nga giingong gamit ang iyang kamot.
Niangkon usab ang usa sa mga suspek nga nag-video nga iyang gihikap ang ubos nga pribadong parte sa lawas sa dalaga.
"Pagsulod nako mao na dayon to. Ana siya video. Pero, moangkon ko nga nakagunit gyud ko sa private part. Di pud ingon nga dugay," matud niini.
Bahin ni Police Executive Master Sergeant (PEMS) Ricky Bagas, officer-in-charge sa Police Station 5 (PS5) sa Macabalan, nga tulog kaayo ang babaye sa kahubog dihang gihimo sa mga suspek ang krimen.
"Diha gyud na kay ila mang gi-videohan. Ang delekado ra ma-upload. Dili man na ang nahitabo. Inom man gud. Kung wala sila'y intention, dili nila hilabtan kay babaye nakainom na biya na. Gisakyan nila ang panahon," matud ni Bagas.
Samtang, sumala sa pamahayag sa dalaga nga nakadesisyon siya nga matulog dihang nahubog na sa dili pa mopauli sa ila. Apan, mao na lang iyang namat-an nga gitabunan iyang nawong og habol ug iyang nakita ang isa ka suspek nga nag-video, samtang ang birthday boy ug ang naka-ikyas ang nakahilabot kaniya samtang lookout ang laing duha.
Kasamtangang anaa sa mini-cell ang mga dinakpan ug padayong gi-imbestigahan, ilabi na nga giingong pipila niini ang wala nakahilabot ug igo lang kining nakauban sa inom. Gipangita pa usab ang laing usa nga kauban sa mga suspek Miyerkules.
