NAMAT-AN nalang sa magtiayon nga nangaputol ug napuno sa tinigbasan ang mga punoan sa saging niadtong Sabado, Nobiyembre 9, sa Soldiers Hill Subdivision, Bulua, dakbayan sa Cagayan de Oro.
Nidangop sa kapulisan si Rosalinda Avenido, 58, minyo, residente sa maong dapit ug gireklamo ang usa ka Nick, 34, kinsa nagpuyo usab sa nahisgutang lugar.
Sa pakighinabi sa VoxPop Supervoxpop kang Avenido, gikabutyag nga una na nga nawala ang ilang kanding ug gikumpronta niya si Nick tungod kay nakit-an kini nga dunay gikarga apan nibutyag si Nick nga sound system nga giprenda ang iyang gikarga.
Apan, ning ulahing pagkahanaw sa ilang laing kanding susama gihapon nga giputol ang pisi apan naghilom nalang sila aron wala nay gubot apan nakurat sa dihang sila ang gisulong rason nga nisamot ang pagduda.
"Sus! Pagtan-aw pa karon, giputol man gyud ang pisi. Unya naa pa ang sako nga sudlan unta sa kanding unya dako man ang kanding naa pa ang agi sa tiil. Pero nadala gyud ang kanding. Ako giingnan akong bana nga pasagdan nalang. Perminte gyud sila lisod kay dautan man ilang binuhatan," matud ni Avenido.
"Pagkagabii, ngano man nga nanulong siya? Nanulong siya nga hubog? Nagdala og sundang," dugang pa.
Gidugang pa niini nga ila na kining gipasagdan apan wala na makaagwanta sa dihang gipamutol ilang mga saging.
Nagbahad pa ang suspek nga balikan sila ug pamatyon kay mga matapobre.
Ang insidente nakatala na sa buhatan sa kapulisan.
