NAGPAHIMANGNO ang lokal nga kagamhanan sa siyudad sa Cagayan de Oro nga dili sulayan sa pagpeke ang narangay exit pass tungod kay duna kini code ug makasohan ang kinsa man nga mohimo niini.
Nasayran nga mga anaa sa kapin 200,000 ka mga barangay exit pass ang gitakdang matunol sa tanang barangay sa dakbayan.
Nakalatid sa barangay exit pass nga usa lang sa matag pamilya ug usa lang ang makagamit kon mogawas kung duna'y importanteng lakaw; magamit kini sa matag membro sa pamilya gawas lamang sa mga mabdos, senior citizen, ug mga naghambing og balatian; libre kini ug walay bayad; kinahanglan nga kung mogawas dala ang exit pass magsul-ob og facemask; dili usab kini magamit panahon sa oras sa curfew; ang city government lang ang maka-isyu niini ug ihatag kini pinaagi sa pagtunol sa matag pamilya diha sa tagsa-tagsa ka mga panimalay.
Gibutyag ni City Administrator Teodoro Sabuga-a nga duna kini code sa matag pamilya ug bisan ordinaryo lang kini, dili kini mapeke.
"Kini nga card ordinary siya pero coded ni siya, so I hope ayaw mo og attempt gyud sa pag-replicate ani kay kung masapon kamo na tua nasab moingon nasab nga istrikto kaayo. Makasohan man mo kay kini sa gobyerno man ni hinaot nga klaro na sa atong mga kaigsoonan," matud ni Sabuga-a.
Gihangyo usab niini ang katawhan nga dili magdasok sa mga barangay hall gumikan kay ihatod kini mismo sa mga matag panimalay.
"Gihangyo ang tanan nga ayaw na mo paglakaw o pag-anhi sa Barangay hall. Naa'y mga tawo nga mobisita sa inyong tagtagsa ka balay," dugang pa.
Gipasabot usab ni Mayor Oscar Moreno nga tumong sa barangay exit pass nga hapsay ang pamaagi sa matag barangay ug aron nga masabtan sa katawhan nga kinahanglan nga magpuyo sa balay.
