WALAY multa nga gipahamtang niadtong mga nasapon nga naghimo og palina atol sa kasaulogan sa Adlaw sa mga Santos ug Kalag sa Bolonsori Cemetery sa Barangay Camaman-an, ning dakbayan sa Cagayan de Oro.
Kini human gibutyag sa City Local Environment and Natural Resources Office (Clenro) nga gidili na ang mga pagpalina tungod kay makadaut kini sa panglawas sa katawhan.
Gibutyag ni Engineer Armen Cuenca, tsirman sa Clenro, nga nahimo kining negusyo sa pipila nga anaa nanimuyo dapit sa sementeryo labina niadtong nga bata.
"Wala'y tawo nga siya mismo naghaling aron nga mopalina kay molabay siya. Ang naghaling didto kanang nagnegosyo kau. Negosyo man P5.00 ang labay," matud ni Cuenca.
Matud ni Cuenca, gibadlong lang nila ug wala pa gipamulta apan sila nanghinaut nga sa sunod tuig hingpit na kini nga mawala.
"Wala ta nag-isyu tungod kay tradisyon man gud. Murag lisod siya nga pugngan diretso. Taman ra gyud ta sa pagbadlong. Nanghinaot ta nga sunod wala na gyud," dugang pa.
Buot usab niini nga masabtan sa katawhan nganong ginadili kini dili tungod kay dunay multa, apan sila na mismo sa ilang kaugalingon ang hingpit nga makasabot nga makadaot kini sa panglawas ug sa kinaiyahan.
