USA ka gatos ka pesos ang kuhaon gikan sa mga bonus sa mga empliyado sa City Hall ning dakbayan sa Cagayan de Oro aron ihatag ngadto sa mga biktima sa linog sa Cotabato City.
Ang City Hall dunay 3,000 kapin ka mga empliyado lakip na ang mga job order.
Gipahibalo kini ni City Administrator Teddy Sabuga-a Jr. atol sa pagpakayab sa nasudnong bandila kagahapon, adlaw nga Lunes.
"Isyuhan og memorandum para pag-remind sa commitment sa mga empliyado nga ilang bunos karon mag-deduct og P100 para i-donar sa calamity, automatic," matud ni Sabuga-a.
Gidugang pa niini nga tigumon kini aron ipadala sa mga biktima ug dugang lang kini sa itunol nga hinabang sa lokal nga kagamhanan sa siyudad sa Cagayan de Oro.
"Tigumon nato. Hopefully, mahimo nang way of life sa ato sa mga taga City Hall nga every time naay mga ingon ana labi na during sa bonus nato atong kuhaan og tagsa ka gatos para lang mahatag nato didto sa nanginahanglan og tabang," dugang ni Sabuga-a.
Ubay-ubay ka mga pamilya ang nabiktima sa sunod-sunod nga pagtay-og niadtong niaging semana.
