GISUGYOT ni Konsehal Roger Abaday nga tugotan sa pagbaton o pagdala og armas ang mga sakop sa Roads and Traffic Administration (RTA) aron nga mapanalipdan ang ilang kaugalingon sa risgo sa ilang trabaho.
Kini human dunay gipatay nga laing traffic enforcer nga si Mark Langam niadtong nilabay nga semana.
Gibutyag ni Abaday nga buot niini nga matugotan sa pagdala og armas ang mga sakop sa RTA labi na ang nadestino diha sa kadalanan aron nga ma-proteksiyonan ang ilang mga kaugalingon.
"Ang ato ila lang safety while they are working as enforcer, this is one way to motivate also and to protect our personnel dinhi sa atong dakbayan," matud ni Abaday.
Giklaro niini nga ang gisugyot mao ang pagtugot pagdala og armas panahon nga mag-duty.
Samtang supak si Konsehal Romeo Calizo, tsirman sa police, fire and public safety, tungod kay giingong taas kini nga proseso gani nibutyag nga gisulayan na kini kaniadto sa kaulohan labi na sa MMDA apan napakyas kini tungod kay dili basta-basta ang pagtugot sa pagbaton og armas sa mga personahe.
"Ako dili ko uyon, there's a lot of requirements before you can armed a person lisod kaayo na only those have undergone training should possess and used their firearms," matud ni Calizo.
Gidugang pa niini nga mas maayong bansayon pa ang mga sakop sa RTA ilabi na sa pag-edukar kanila diha sa law enforcement o pagpatuman sa balaod labi na diha sa pamaagi sa pagbadlong o pagdakop sa mga makasupak sa balaod.
Lakip usab si Konsehal Jocelyn Rodriguez ang supak nga tugotan sa pagdala og armas ang mga sakop sa RTA nga anaa sa kadalanan.
