DUHA ang nakabsan sa kinabuhi samtang 33 ang samaran sa laing bangga nga nahitabo mga alas 9 sa buntag niadtong Martes, Disyembre 17, sa KM26, Barangay Tikalaan, lungsod sa Talakag, Bukidnon.
Kini gilangkoban sa usa ka forward truck nga gimaneho ni Michael Abanacion, 24, taga Barangay Cacaon, Talakag, Bukidnon diin sakay ang 49 ka mga tawo.
Duha ang gideklarar nga dead on arrival sa Talakag Provincial Hospital nga mao sila si Manuel Alfoque Jr., 74, taga Baranagay Cacaon, Talakag, Bukidnon ug si Bonifacia O. Abot, 76, residente sa susamang dapit.
Sa gihimong imbestigasyon sa Talakag Police Station sa pagpangulo ni Police Captain Dominador Orate, nasuta nga misubay sa dalan kining forward truck gikan pa sa Talakag paingon unta sa Cotabato City aron moapil og fellowship sa ilang simbahan sa Church Spirit of the Truth.
Apan pagdangat sa kurbada nga bahin sa dalan ug sa kusog nga dagan, nawad-an og kontrol ang sakyanan maoy hinungdan nga nabalitok ug nangahulog ang mga sakay niini.
Sa kinatibuk-an, 33 ka mga pasahero ang gi-admit sa balay tambalanan human nga naangkon og mga minor nga samad, samtang 14 kanila ang pulos gidala sa Northern Mindanao Medical Center (NMMC), dakbayan sa Cagayan de Oro tungod sa mga seryoso nga naangkon sa nagkadaiyang parte sa lawas.
Si Police Colonel Lamiing, Provincial Director sa Bukidnon Police Office, kanunay nga nipahimangno sa mga driver nga gabiyahe sa Bukidnon nga susihon kanunay ang kondisyon sa ilang mga sakyanan aron malikayan ang mga susama niini nga mga insidente.
Sakay sa maong sakyanan sila si Nicuy C. Beltran, 30; Erico V. Dobugan, 46; Aileen S. Aguray, 36: Emerson M. Ubaob, 53; Ricardo C. Abaliawion, 70;, Mariam A. Doongan, 16; Windenn D. Neri, 11; Rosa Neri, 39; George A. Mabaylan, 31; Ronnie M. Ubaob, 48; Pinky Joy M. Abot, 8; Udarfreuyeslter A. Guilay, 7; Ruby A. Neri, 60; Althea Jade N. Baba, 6; Piercy M. Abot, 51; Ian Rey A. Yamado, 6; Rolando O. Abot, 52; Christian D. Neri, 15 John Paul A. Mabaylan, 11; John Carlo A. Neri, 15; Ashley B. Guilay, 12; Girlene B. Guilay, 14; Gilbert A. Mabaylan, 7; Rea Mae A. Mabaylan, 11; Charisse B. Ubaob, 8; Benny U. Prito, 5; Emerson B. Ubaob, 10; Travis A. Abot, 12; Arzaneth B. Abello, 4; Benjoe Flores, 40; Grace Mary A. Mabaylan, 20; Kimberly A. Mabaylan, 17; ug Dodima Mabaylan, 74, pulos taga Barangay Cacaon, Talakag, Bukidnon.
