MOKABAT ngadto sa P136,000 ang kantidad sa shabu (methamphetamine hydrochloride) nga gipasok sa sandal ug gisulod sa LBC Express package, ang nakumpiska sa mga awtoridad atol sa operasiyon niadtong Biyernes, Mayo 8, sa LBC Express Gingoog City Branch, Door 2, Canada Bldng., Barangay 17, Gingoog City, Misamis Oriental.
Giingong nagpahigayon og random K9 inspection ang elemento sa PDEA AIU/SIU sa pagpangulo ni c0hief AIU/SIU IAV Jerard Nyll Pica kauban ang assistant chief/team leader IO2 Michael Brandon J. Abarquez ug PDEA Misamis Oriental Team sa pagpangulo ni Assistant PO IAV Expedito Cardona ubos sa superbisyo ni PDEA ROX regional director, Director III Wilkins Villanueva sa maong patigayon.
Ang maong operasiyon kalabot na sa pagpatuman sa mandato nga magpahigayon og random search and seizure operations sa mga seaport/airport/mail ug parcel establishments lakip na bus/van/jeepney terminal facilities sa rehiyon.
Gikabutyag nga atol sa random K9 paneling, naka-detect ang duha ka narcotics dogs nga si Bruno ug Jagger sa posibleng indikasiyon sa presensiya sa ilegal nga druga rason nga gi-refer ngadto kay Agent IAV Cardona kinsa nakig-koordina ni Gingoog City Police OIC Police Lieutenant Colonel Arnel Philip Pontillas.
Sa follow up operation, positibo nga na-entrap ang tag-iya sa maong package nga sila si Edu Parnada, 31 , ug Kyle Mark Yecla, 21 ug pulos residente sa Purok, 2, Barangay 23, Gingoog City.
Nakumpiska gikan sa mga suspek ang anaa sa 20 gramo nga gitoohang shabu nga gitagoan sa ladies brown rubber sandal nga nakasulod sa LBC Express package. (With PR)
