GIDID-AN sa probinsya sa Misamis Oriental ang mga sibilyan nga pasahero nga mosakay sa mga military aircraft diha sa Laguindingan Airport, Laguindingan, Misamis Oriental.
Gibutyag ni Jocelyn Mateo sa Provincial Information Office nga dunay bag-ong gi-isyu si Governor Yevgeny "Bambi" Emano sa lalawigan sa Misamis Oriental nga Executive Order 2020-014 sa pagdili sa mga sibilyan nga mokanaog sakay sa mga military aircraft.
"2020-014 entitled executive order prohibits any civilian passengers from disembarking from a military aircraft nga arriving at Laguindingan airport for the entire duration sa atoang general community quarantine sa Misamis Oriental," matud ni Mateo.
Gibutyag niini nga kini nga executive order gi-isyu gumikan na usab sa taho nga dunay mga military aircraft nga dunay pasahero nga sakay ug tumong niini nga kamandoan nga mas mapahugtan pa ang pakigbatok sa virus aron nga wala'y makasulod sa probinsya.
Kahinumdoman nga ang mga military aircraft usa sa mga gitugotan nga makabiyahe ning panahon sa coronavirus disease (Covid-19) pandemic.
"Usahay makit-an nato nga naa'y mokuyog, mosingit ba kaha pwedi man sila provided nga naa siya'y clearances, clearance of course from the IATF, kung naa siya'y certification nga negative siya sa Covid-19," dugang pa.
Giingon kini nga kamandoan hangtod sa pagtapos sa gideklara niining general community quarantine karong umaabot nga Abril 30.
Samtang una na nga gibutyag ni Lieutenant Colonel Xerxes Trininad, spokesperson sa Fourth Infantry Division (4ID) Philippine Army, nga ang Philippine Airforce maoy nagpasilitar sa mga cargo flight ug sa mga pasahero nga mosakay niini.
Gipasabot usab niini nga duna'y mga parameter nga gi-set ug gisuta ang Philippine Airforce ug duna'y koordinasiyon sa entry ug exit point nga kinahanglan duna'y clearances ang usa ka indibidwal.
