BUOT sa kadagkoan sa lokal nga kagamhanan sa dakbayan sa Cagayan de Oro lakip na sa kapulisan nga ipatuman ang "signal jamming" sa kasaulogan sa kapistahan sa Itom nga Nazareno karong Enero 9.
Kini aron nga masiguro nga luwas ug dili mahatagan og kahigayon ang mga dautang elemento nga dunay planong mosabotahe sa kalinaw sa dakbayan ilabi na niining traslacion.
Gibutyag ni Konsehal Romeo Calizo, tsirman sa komitiba sa Police Fire & Public Safety, nga kung dunay panginahanglanon gyud nga mag-signal jam ila gyud kini nga ipatuman.
Giingong kini lang ang pamaagi nga malikayan kini ilabi na kung dunay mga hulga sa pagpamomba ginamit ang cellular phone.
"If there's a need we will effect signal jamming, mao man go'y pamaagi because right now high tech naman gud ang mga terorista," matud ni Calizo.
Gidugang pa niini nga ayha pa ang pagpahibalo kung duna nay nahitabong signal jamming.
"Kini man gud announcement if there's a security plan, ang announcing ani na pamaagi is classified, so the announcement will just come if the signal jamming is already there," dugang pa.
Gipasabot usab sa kapulisan ilabi na ni PCol Erwin Meneses, Deputy City Director for Administration nga gikonsidera kanunay sa mga otoridad nga dunay hulga aron nga mapangandaman ug dili mamahimong magkumpiyansa gumikan kay lisod na kung ayha na molihok kung simbako duna nay mahitabo.
"We always presumed nga naay threat, it's better to be prepared," matud ni Meneses.
"Ang atong presumption is naay prevailing nga threat so kubg wala ginansiya ta, kitang tanan ginansiya," dugang niini.
Samtang lakip usab ang gipangandaman ang ihulip nga gamiton alang sa komunikasiyon panahon nga dunay signal jamming.
Naghangyo usab ang kapulisan sa katawhan nga magtinabangay ug suportahan ang mga otoridad pinaagi sa pagbinantayon ug itaho gyud dayon kung dunay mamatikdang mga katingad-an o kadudahang indibidwal o butang.
