NAGHILAK ug nagsige og singgit ang usa ka tomboy kinsa buot nga magpakamatay pinaagi sa pag-ambak sa tulay sa J.R Borja Bridge, ning siyudad sa Cagayan de Oro, Lunes sa kaadlawon, Disyembre 1.
Apan, sa gihimo nga negosasyon, napakanaog ra si alyas Yayang gikan sa maong tulay.
Sa impormasiyon gikan sa Police Station 4 (PS4) sa Carmen, gikabutyag nga naguol pag-ayo si Yayang gumikan kay gibulagan sa kaipon tungod kay nakigbalik kini sa iyang kanhi hinigugma nga usa ka lalaki.
Samtang giangkon usab sa kaipon niini nga gikapoy na siya sa ilahang pamuyo tungod kay grabe ang pagpangita niya og kwarta aron nga mabuhi kini kauban ang anak lakip na usab ang anak ni Yayang.
Gidugang pa usab niini nga gawas nga siya ang gapanginabuhi, giingong kulatahon pa siya ni Yayang.
Samtang gipa-monitor na kini sa lokal nga kagamhanan sa siyudad ilabi na sa City Administrator nga si Teodoro Sabuga-a ug ipaatiman sa City Social Welfare and Development (CSWD) aron matabangan ug mahatagan og insaktong tambag.
"I-monitor ang maong babaye kay nisaka lage didto sa tulay kay moambak. Ipasa dayon sa CSWD para sa counseling kay kinahanglan kadto ka depress kaayo," matud ni Sabuga-a.
Nagpahimangno kanunay ang lokal nga kagamahanan sa siyudad nga dili angayang tapuson ang kinabuhi tungod kay tanang problema dunay kasulbaran.
Nag-aghat usab kini nga kung nakasinati og depresiyon, motawag sa 911 o modangop sa buhatan sa CSWD aron matabangan.
