TULO ka mga barangay sa dakbayan sa Cagayan de Oro ang gikabutyag nga dunay labing daghan nga persons under monitoring kon PUM dinhi sa siyudad.
Anaa sa 920 ka mga PUMs ang natala sa dakbayan sa Cagayan de Oro diin ang mga naka kwarantinas karong panahona anaa na lang sa 636.
Gibutyag ni Dr. Lorraine Nery, OIC-City Health officer, nga ang PUM walay sakit nga coronavirus disease (Covid-19) ug walay mga sintomas apan duna lang silay mga kasaysayan sa pagbiyahe ug dili angayang kabalak-an tungod kay hugot ang pagmonitor niini sa mga Barangay Health Emergency Response Teams (Bherts) sa matag barangay.
Giklaro usab niini nga kini nagpasabot lang nga naglihok ang mga Bherts ilabi na nga nasayran kini sila nga dunay mga travel history ug dunay tulo ka mga barangay nga nakatala og pinakadaghan nga ihap.
Gidugang pa nga matag barangay dunay mga PUM.
"Ang top three lang among ihatag no naa ta'y daghan sa Barangay Bugo, Macasandig ug Carmen," matud ni Nery.
Gidugang pa usab niini nga kung duna man sila'y mga sintomas, dili usab kini pasabot nga Covid-19 na.
"Pero kani akong usbon sa publiko, these are persons under monitoring. Wala ni sila'y sakit nga Covid. Dili ni sila positive, ato ni silang ginamonitor lang," matud ni Nery.
Gidugang pa usab niini nga kinahanglan nga aktibo gyud ang Bherts diin nga kung duna man sila'y mga sintomas, mamonitor gyud dayon.
"Anytime nga naa sila'y makit-an or mag manifest sila og mga sintoma, magpahibalo gyud dayon para matagaan nato sila og insakto nga pagtambal and again dili pasabot nga naa sila'y sintoma automatically Covid na ni sila," dugang pa.
Giingong daghan ang rason nga maka-develop sa maong sintoma.
