HUGOT karon nga gipatuman sa lalawigan sa Misamis Oriental ang "no quarantine pass/travel pass no travel policy" kung mogawas ug mosulod sa lalawigan sa Misamis Oriental.
Gisugdan diretso ang implementasyon niini sa mga quarantine checkpoints sa lalawigan.
Kini usa ka executive order no. 2020-011 ni Misamis Oriental Governor Bambi Emano.
Gipasabot ni Atty. Jeffrey Saclot kinsa spokesperson sa Misamis Oriental Provincial Task Force for Covid-19 nga kung trabahante ka sa Cagayan de Oro ug taga Misamis Oriental gikinahanglan ka mokuha og travel pass sa lungsod nga imong gipuy-an.
Mahimo kini nimo kuhaon sulod lang sa usa ka semana ug i-renew na usab sa sunod nga semana.
Kung ang imong gigikanan sa Cagayan de Oro City ug mopaingon sa Misamis Oriental kuhaon ang travel pass sa City Health Office sa siyudad.
Apan kung ang imong lakaw anaa lamang sulod sa inyong munisipalidad pwede ra kuhaon ang quarantine pass sa barangay.
"Travel pass ang pangitaon sa atong checkpoint. Walay gi-require nga health card, the travel pass alone magpamatuod nga fit to travel ang gadala ani. Didto na pangayuon ang travel pass sa city or municipal health officer ninyo," pasabot ni Saclot.
Gihangyo niini ang pagsabot sa katawhan kung nakasinati og kahasol.
"Again, we ask for your kind understanding if you experience any inconvenience, we are doing this to make sure those who travel are free of the covid 19 disease or any of its symptoms," matud niini.
Gikan sa Abril 14, 2020 ang lalawigan sa Misamis Oriental nagpabilin nga walay kaso sa Covid-19. Wala na usab natala nga person under investigation ug adunay 608 nga person under monitoring.
