GIBUKSAN sa kapitolyo probinsyal ang selebrasyon sa Women's Month agi ug pagtahod ug pagpangga dili lang alang sa mga empleyado apan sa tanan kababayen-an.
Ang tema sa selebrasyon mao ang "Atong himoun ang kausaban para sa kalamboan sa atong kababayen-an," ug agi og pagtahod sa kababayen-an ning kasaulogan sa International Women's Month ang mga empleyado sa Kapitolyo ang nidalit og sayaw alang sa kababayen-an sa pagpanguna ni Misamis Oriental Governor Bambi Emano.
Game kining misayaw sa trending dance nga "Tala" ni Sarah Geronimo aron pagpaabot sa iyang pagdayeg ug pagrespeto sa kababayen-an. Undanon sab iyang gipaabot nga mensahe dili lang alang sa kababayen-an apan ngadto sa kalalakin-an nga unta maoy mopangga ug morespeto sa ilang mga asawa ug partner.
"I have always respected women ever since because everytime I look at you, I always see my mother. Never forgot and will never be forgotten that mom gisabak ko niya siyam ka bulan sa iyang tiyan ug siyam ka bulan siya nag amping nga di siya nakakaon ug makahilo, nag amping nga di siya nadigyas nag amping nga diko mapasipad an wala pa gani ko matawo sulod sa iyang tiyan," matud ni Emano ug nasayod nga dili tiaw ang pag-antos ug kasakit nga gibati sa pagpanganak.
Gihangyo sab niini ang mga kalalakin-an nga respetuhon ang ilang mga asawa.
"Those who are here who have a wife panggaa ang inyong asawa," matud niini.
Gipaabot sab ni Emano nga anaa sa mga kababayen-an ang batasan nga pagkapasensyosa ug kalimpyo nga dili matupngan sa kalalakin-an.
"Imagine if ang lalaki ang ibilin sa balay siguro tanan plato buak, tanan aparador abog unya dina gani abog ang ilawon sa katre apan lapok kay di ta kabalo. Not because women are for cleaning, not because women are for cooking but they actually have a talent, they actually have a talent more than what we have especially ilang patience, very cleanliness nga di malumbaan sa kalalakin-an," matud niini.
Gikatakda ang dakong selebrasyon sa kababayen-an sa Kapitolyo samtang ang kalalakin-an ang giingong mag out of town.