Usa ka sunog ang niulbo sa Sitio Panaghiusa, Barangay Carreta, dakbayan sa Sugbo, niadtong Sabado sa gabii Enero 18, 2025, diin 16 ka mga pamilya ang nawad-an sa ilang pinuy-anan ug mikabat sa P3.87 milyunes ang danyos sa kabtangan.
Ang sunog nga nagsugod alas 9:11 sa gabii, nakaapekto sa 11 ka mga balay ug usa ang hingpit naugdaw, matod sa Cebu City Public Information Office (PIO).
Duha sa mga apektadong pamilya ang nagpuyo og usa ka balay, usa ang nag-abang, ug laing usa ka pamilya ang nakasinati og gamay nga kadaot sa ilang balay.
Giisa sa ikaupat nga alarma ang sunog alas 10:41 sa gabii ug hapit moabot og usa ka oras ang sunog una hingpit napawong.
Ang mga apektadong pamilya nga gilangkuban sa 48 ka mga indibidwal, nidangop sa mga paryente ug higala sa lugar.
Nakaangkon og second-degree burns ang usa ka residente nga si Rustico Casas Jr.
Ang Cebu City Government, pinaagi sa Department of Social Welfare and Services, nihatag og tabang ug pag-apud-apod og tulo ka adlaw nga meal packs.
Girekomenda usab ang pinansyal nga tabang alang sa mga bakwit nga pamilya.
Nagpadayon pa ang imbestigasyon aron masuta ang hinungdan sa sunog.(DVG)
