Naluwas sa kapulisan sa nasod sa Thailand ang duha ka mga baby orangutan gikan sa pagbaligya unta niini ngadto sa Bangkok samtang nasikop usab ang suspetsado nga suway mibaligya niini.
Ang mga orangutan naluwas niadtong Miyerkules sa gabii, Mayo 14 ug ang giingong modeliver unta niini sa namaligya gidakop sa usa ka gasolinahan, matod sa kapulisan.
Ang suspek gipasakaan og kasong illegal possession of protected wildlife ug mag-atubang og hangtod sa upat ka tuig nga pagkabilanggo kon mapamatud-an nga sad-an.
Matod sa kapulisan nga ang mga orangutan kasagaran nga gibaligya sa kantidad nga 300,000 baht ($9,000) matag usa.
Ang International Union for Conservation of Nature milista sa mga orangutan isip critically endangered, ug ang Convention on International Trade in Endangered Species (CITES) nagdili sa cross-border trade sa mga hayop.
Ang mga orangutan makit-an lamang sa kalasangan sa Sumatra ug Borneo, apan ang ilang pinuy-anan nagkagamay tungod sa paglambo sa yutang pang-agrikultura, nga naghimo sa maong mga mananap nga mas delikado sa pagpanguha.
Sa nakalabay nga duha ka dekada, ang Thailand nakauli na og daghang mga orangutan sa Indonesia.
Ang U.S. Immigration ug Customs’ Enforcement and Interpol, ang internasyonal nga organisasyon sa pulisya, mibanabana sa tinuig nga kantidad sa ilegal nga pagbaligya sa wildlife sa $10 bilyon hangtod $20 bilyon.
Gitugyan sa kapulisan ang duha ka orangutan ngadto sa Department of National Parks, Wildlife and Plant Conservation alang sa pag-atiman ug safekeeping. / AP