Ang kadagatan sa lungsod sa Argao abunda sa mga dagkong isda. Laing mananagat ang nakakuha sa iyang pagpamasol sa duha ka mga dagkong tangigi.
Basi sa pakighinabi sa Supervoxpop Cebu sa nag-post sa Facebook nga si Te Ray ‘’Theresa Ampongan”, taga Lawis Lo-oc. Barangay Poblacion, Argao, siya niasoy ang nakakuha sa duha ka dagkong tangigi mao ang mananagat nga si Michael Angelo Kintanar nga iyang silingan ug iyang gikompra.
Si Kintanar, matod ni Te Ray, ang nanagat niadtong hapon na sa Sabado, Nobiyembre 25, 2023, sa kalawran sa Lawis point pinaagi sa panagat sa paggamit sa pumpboat nga magguyod sa pasol nga may taga nga gipan-an og balhibo sa manok nga gitina sa kolor nga makailad sa isda nga ila kining pagkaon nga niresulta sa pagkakubit sa duha ka dagkong tangigi.
Ang maong duha ka tangigi ningtimbang og 24 kilos ug dali ra kining nahalin sa tag P450 ang kilo nga nihalin tanan og dul an P11,000.
