NILAMPOS ang kapulisan sa Carcar City sa pagdakop sa duha ka mga suspek nga nipatay sa babaye’ng call center agent, nga gipusil patay niadtong alas 6 pasado sa buntag, Huwebes, Marso 27, 2025, sa Sityo Luan-Luan, Barangay Poblacion 1, Dakbayan sa Carcar.
Ang biktima nga si Enad Sato, 28, minyon ug adunay mga gagmay'ng mga anak ang namatay human gipusil tumong sa iyang ulo.
Ang mga suspek nga pulos way mga trabaho giila nga sila si alyas Al, 39, minyo nga taga Sityo Kapusoan, Barangay Poblacion, Lungsod sa Sibonga, ug alyas Jun, 35, ulitawo nga taga Sityo Tapon, Barangay Napo, Carcar City.
Si Al nasikop sa ilang balay sa Sityo Kapusoan sa alas 5 sa hapon, samtang si Jun sa sa Sityo Tapon.
Nakuha gikan kang Al ang usa ka 9mm pistol ug duha ka magazine niini nga adunay 21 ka mga bala ug cellphone, samtang 45 kalibre nga pistola nga dunay silencer ug magazine nga dunay unom ka mga bala ug motorsiklo nga giingong maoy gigamit sa krimen ang nasakmit gikan ni Jun.
Si Sato nipauli sakay sa motorsiklo gikan sa iyang trabaho atol sa hitabo.
Igo nga mi-parking sa iyang motorsiko ang biktima, diha na ang mga suspek ug way pagduhaduha nipusil sa biktima gamit ang armas gitaoran og silencer.
Nasuta nga ang biktima nakadawat na og hulga sa iyang kinabuhi gumikan sa utang nga wa mabayri.
Base sa nahipos nga kasayuran sa Carcar City Police pinaagi sa ilang hepe, PLCol Ruel Burlat nga adunay giutangan si Sato nga mokabat sa P80,000 nga gipa-utang sab sa biktima ngadto sa laing tawo pinaagi sa E-loan.
Giingong gisigehan na og paningil si Sato sa financier apan wa kini'y ikabayad kay ang iyang gipautang wa sab mamayad.
Matod pa ni Burlat nga taodtaod na ang maong utang ug posible nga gipul-an na og paningil ang maong financier hinungdan nga gipapatay.
Dugang pa ang mga dinakpan human nila napatay si Sato ilang gidauban ang ilang mga sinina nga gisul-ob niadtong higayona, helmet, ug uban nilang gamit gawas lang sa motorsiklo nga ilang getaway vehicle.
Gisubay pa karon sa kapulisan ang mastermind sa maong krimen human nga nagmagahi ang mga dinakpan sa pagtug-an kon kinsay nagsuggo nila. / DVG / GPL
