"Sinulog fever is back!"
Kini ang komentaryo ni Cebu City Mayor Raymond Alvin Garcia dihang nahinabi sa VoxPop Cebu live coverage sa Cebu City Sports Center (CCSC) niadtong Dominggo sa hapon, Enero 19, 2025, atol sa Sinulog Grand Showdown.
Dako ang kalipay sa mayor nga nahibalik ang bagang duot sa katawhan nga ningduyog sa Sinulog Festival lakip sa kadaghan sa mga maanindot nga contingents labina ang out of town.
Ang Cebu City Disaster Risk Reduction and Management Office ug Cebu City Police Office (CCDRRMO) ug Cebu City Police Office (CCPO) nibanabana nga dili mominos 4 milyunes ka mga tawo ang ningdasa sa Sugbo aron pagsaksi sa Sinulog Festival.
Kini ang gibutyag sa CCDRRMO ug CCPO human sa ilang tigom sa pasiunanng pag-assess sa kalihokan lakip sa pagbanabana sa mga nanambong.
Giapil sa pag-ihap ang mga tawo nga naa sa Plaza Independencia, sulod sa Basilica Minore del Santo Niño, ug mga mall sa dakbayan sa Sugbo nga dunay kalingawan sa Sinulog.
Puno ang CCSC ug bagang duot sa katawhan sa carousel route uban sa pagtumaw sa kadaghan sa ginagmay nga negosyo sa kadalanan.
Samtang, base sa taho sa VoxPop Cebu, ang banabana sa gidaghanon sa miaging tuig Sinulog 2024 naa sa 3 milyunes diin gipahigayon sa South Road Properties (SRP) ug dunay 21 ka contingents.
Ang Sinulog 2025 dunay 43 ka contingents ug mas daghang float kon itande sa miaging tuig.
Nalangay ang pagsugod sa parada o carousel ug dunay hamubo nga pagpakahunong tungod sa pagkasangit sa float sa banderitas sa dan.
Gawas niini, hapsay, nanumbalik ang kaalegre sa festival sa naandang venue ug malampuson sa kinatibuk-an ang Sinulog 2025.
Atol ning pagsuwat, pasado alas 8 sa gabii, duna pay 15 ka contingents ang wala matapos sa Grand Showdown sa CCSC stage.
Alang sa kompleto nga estorya, uban sa live streaming, makita sa www.voxpop.com.ph. (AYB/RRM)