Walo ka establisemento nga nahimutang sa General Maxilom Avenue sa uptwown, Dakbayan sa Sugbo, ang giisyuhan og show cause order sa Business Permit and Licensing Office (BPLO) sa kagamhanan sa dakbayan human makalapas sa executive order ni Cebu City Mayor Raymond Alvin Garcia nga nagdili sa pagpaninda sa ilimnon nga makahubog sa ruta sa Sinulog Grand Parade sulod sa 300-meter radius.
Ang mga establisemento naabtan sa inspection team nga gilangkuban sa BPLO, kapulisan, Prevention Restoration Order Beautification and Enhancement (Probe), City Environmental Sanitation Enforcement Team (Ceset) ug Cebu City Transportation Office (CCTO), alas 12:01 sa kadlawon, Enero 19, 2025.
Matod ni Police Lieutenant Colonel Maria Theresa Macatangay, deputy city director for operation sa Cebu City Police Office (CCPO), nga ilang naabtan nga nag-serve og ilimnon nga makahubog ang walo ka mga estabilisemento.
Gihatagan sila og tulo ka mga adlaw nga makapasabot sa kagamhanan sa dakbayan nganong dili sila silotan subay sa kalapasan nga ilang nahimo.
Kung dili matagbaw ang kagamhanan sa dakbayan sa pagpasabot sa maong mga imnanan, mamahimong mag- atubang kini'g silot sama sa pagkanselar sa ilang mga permit o multa.
Kasagaran sa rason sa walo ka mga establisamento nga na-order ang mga ilimnon sa wala pa ang alas 12:01 sa kaadlawon ug naabtan kini sa maong oras nga wala pa nahurot ang giinom.
“There is no qualification in the mayor’s EO as long as within that period alcoholic drink was consumed in the establishments property they shall be accountable for it, they should not have sold such alcoholic beverages in an hour very close to what was said in a prohibited in the EO,” matod Macatangay.
Dugang ni Macatangay, ang CCPO nipakatap usab og nakasibilyan nga mga police personnel ug nanulod sa mga imnanan nga nasakop pa sa 300-meter radius sa ruta sa Sinulog Grand Parade ug mosuway sila pag-order og ilimnon nga makahubog ug kung mohatag kini ila kini nga ireport sa BPLO. (AYB)
