Gipanghimakak ni Cebu City Mayor Nestor Archival ang pasangil nga ang iyang pagpanag-iya og yuta sa Monterrazas de Cebu nakaimpluwensya sa iyang desisyon nga dili moisyu og cease-and-desist order (CDO) batok sa maong housing development.
Kini human si Guadalupe resident ug kanhi Bantay Dagat Program Director Ed Karlon Rama nidangop og reklamo sa Office of the Ombudsman ug nihangyo nga i-preventive suspension si Archival tungod sa giingong paglapas sa anti-graft law.
Matod ni Rama, adunay 713-square-meter nga property sulod sa Monterrazas nga gipanag-iya ni Archival ug sa iyang asawa nga giingong mahimong hinungdan sa conflict of interest tali sa personal nga interes sa mayor ug sa iyang katungdanan sa publiko.
Sa iyang reklamo, gipasanginlan ni Rama si Archival sa paglapas sa Sections 3(e) ug 3(h) sa Republic Act 3019, o Anti-Graft and Corrupt Practices Act.
Gipasaka sab sa reklamo ang pasangil sa grave misconduct, grave abuse of authority, ug conduct prejudicial to the best interest of the service. Lakip sa gipangayo ni Rama sa Ombudsman mao ang preventive suspension ni Archival samtang gihimo ang imbestigasyon.
Sa interbyu niadtong Lunes, Agusto 31, 2026, gipatin-aw ni Archival nga nagsugod siya sa pagpalit sa maong yuta niadtong 2016, sa panahon nga usa pa lang siya ka private citizen.
Naimpas ang maong pagkapalit sa maong property niadtong 2022. Giingon ni Archival nga husto ang dokumentasyon sa maong yuta ug gilakip kini sa iyang 2025 Statement of Assets, Liabilities and Net Worth (SALN) human siya nilingkod isip mayor niadtong maong tuig.
“I did not hide that,” matod ni Archival.
Gipasabot sab sa mayor nga dugay na niyang background ang pagdisenyo sa underground systems sa Cebu, Bacolod ug Cagayan de Oro, ug giingong nakatabang kini sa iyang pagsabot sa drainage ug water management sa siyudad.
Kalabot sa mga panawagan ni Vice Mayor Tomas Osmeña ug pipila ka miyembro sa City Council nga mag-isyu siya og CDO batok sa Monterrazas, niingon si Archival nga dili siya basta makapahunong sa operasyon kon walay tukmang legal nga basehan.
Matod niya, gisusi na sa environmental regulators ang maong development ug gihatagan kini og clearance. / CAV