Giila sa usa ka brigada sa kasundalohan ang suporta sa Filinvest Land, Inc. (FLI) tungod sa paghatag niini og mga kasangkapan sama sa mga muwebles ug ubang galamiton alang sa gitukod niini’ng edipisyo.
Nihatag ang FLI sa 53rd Engineer Brigade og duha ka trak nga puno sa mga mahinungdanong kagamitan alang sa bag-ong building niini dili pa lang dugay.
Lumad Sugboanon ang mga nanag-iya ug nagpadagan sa FLI, mao nga gaan alang niini nga abagan ang gianggaan nga “Visayas Builders” nga naka-base sa Camp Lapulapu sa Apas, ni’ng dakbayan.
Agi og pagpasalamat, mihatag ang pangulo nga si Brig. Gen. Maynard G. Camarao og plake ngadto sa maong kompanya atol sa ika-38 nga anibersaryo sa pagkamugna sa brigada.
Gidayeg niini ang FLI tungod sa “bililhon nga suporta ug tampo sa mga paningkamot” sa koponan aron makab-ot ang tuyo’g tumong nga mamahimong “World-Class Army Engineers.”
“Gikalipay namo’g pag-ayo nga nakibahin sa kawsa sa 53rd Engineer Brigade padulong sa pagka-labing maayo ug pagkamahinungdanon,” mipahayag si John Paul Escario, FLI assistant vice president ug area general manager alang sa Kabisay-an.
“Ang among katuyoan sa pagpalambo sa mga komunidad ug pag-abag sa mga mahinundanong institusyon sa Sugbo ug sa nasod magpabiling lig-on...” dugang niya.
Gipang-ugmad sa koponang Filinvest ang mga residential, office, ug retail developments, lakip ang Philippine Economic Zone Authority-accredited nga Filinvest Cyberzone Cebu, ang unang business process outsourcing hub sa Filinvest Land gawas sa Metro Manila.
Sa usa ka joint venture tali sa kagamhanan sa dakbayan sa Sugbo, gipalambo sab sa sa Filinvest Land ang City di Mare (CDM), ang Lifestyle Capital of Cebu, diin nahimutang ang IL Corso, ang Filinvest Mall sa Sugbo.
Ang CDM usa ka 58 ka ektarya nga nag-unang kalamboan nga may kompleto ug moderno nga live-work-play nga estilo sa kinabuhi. Kini naglangkob sa 40 ka ektarya nga mixed-used sector ug 10 ka ektarya nga commercial component. Dinhi napahigayon ang 2023 Sinulog Festival ug usab sa Enero 2024. Dinhi sab ang labing una nga pump track alang sa mga aktibong siklesta.
Dugang civic spaces sa CDM gilantaw nga mapahimuslan sa mga taga-dakbayan, sama sa mga hawanan, nga mahimong kabakwitan kon gikinahanglan. Laing dapit igahin sa daghang gamit nga mga natad sa paugnat sa kusog, samtang lain pa igahin alang sa mga kalingawan sama sa mga bazaar, kultura, kan-anan, ug mga panagsang pasundayag.