Naangol ang 56-anyos nga dispatser human gipusposan og tubo sa makadaghang higayon sa tanod sa Barangay Tisa, Cebu City, alas 5 pasado sa buntag niadtong Dominggo, Agusto 30, 2026.
Ang biktima nga giila lamang sa alyas nga Agto nakaangkon og samad sa ulo, tuhod ug tiyan, lakip ang mga bun-og sa lawas human gibunalan sa tubo.
Ang suspek giila sa alyas nga Roel, 56, ug residente sab sa maong barangay.
Base sa imbestigasyon ug sa kuha sa CCTV, kalit nga nanaog ang suspek gikan sa iyang gimanehong barangay patrol nga nagdala og tubo ug gibunalan ang biktima atubangan sa convenience store sa maong lugar.
Depensa sa suspek, giunhan siya og bunal sa biktima kaniadto ug nibawos lamang siya.
Apan matod sa biktima, niadtong Sabado sa gabii, Agusto 29, iyang nasugatan ang suspek nga hubog ug nanghagit kaniya og sumbagay apan wala niya tubayi.
Pagkabuntag, samtang nag-duty siya isip dispatser, iyang nakita ang suspek nga nagsakay sa barangay patrol.
Matod niya, kalit nga nibalik ang suspek, niparking, ug nanaog nga nagdala og tubo.
“Mag-dispatch ko didto sa taxi sa gawas sa 7-Eleven dapit. Niagi na siya unya nimenor siya. Wala ko kabantay nga nibalik diay. Nag-parking, gadala na og tubo. Paglingi nako, gihapsan na ko,” matod sa biktima.
Gibutyag sa biktima, unang gibunalan ang iyang ulo hinungdan nga nalukapa siya ug gisundan pa og puspos sa makadaghang higayon.
Maayo na lang nga adunay laing tanod nga nakaagi sa maong lugar ug maoy nipugong.
Nasayran sab nga dugay na nga dili maayo ang relasyon sa duha, diin giingong kanunay nga magpasingit og istorya ang suspek ug manapat sa mga anak sa biktima.
Samtang, matod ni Leonilo Rogero Jr., chief tanod sa maong barangay, on-duty ang suspek niadtong maong higayona ug paingon unta mamahaw sakay sa barangay patrol dihang naagian niini ang biktima.
Sigon kang Rogero, gisyagitan sa biktima ang suspek ug gihagit sab kini, hinungdan nga nasuko ang suspek ug gibunalan niya og tubo.
Dugang ni Rogero, posibleng masuspenso ang suspek isip barangay tanod tungod sa maong insidente.
Dali nga gitugyan sa kapulisan sa Labangon Police Station 10 ang suspek. /