Pormal na nga nilingkod sa katungdanan ang bag-ong hepe sa Balamban Municipal Police Station nga si Police Lieutenant Colonel Joey Bicoy, kanhi pangulo sa City Intelligence Unit sa Lapu-Lapu City Police Office human hulipi sa katungdanan si Police Lieutenant Colonel Glenn Hife.
Si Hife mao na karon ang kasamtangan nga pangulo sa Provincial Police Strategy Management Unit.
Matod ni Police Colonel Percival Zorilla, hepe sa Cebu Police Provincial Office, nga walay isyo kang Hife nganong girelibuhan siya sa katungdanan sanglit ang rason niini mao ang paghatag og higayon kaniya nga mosaka ang career sa serbisyo pinaagi sa pagbutang sa laing unit.
Si Hife nahimong hepe sa Balamban police station sulod na sa 16 ka buwan, diin daghan na nga accomplishments ang nahimo.
Apan nahimo’ng kontrobersyal ang pagpusil patay sa riding in tandem sa usa ka kandidato pagka kapitan sa Brgy. Cansomoroy nga si Anastacio Pacquiao samtang nagsakay sa iyang motorsiklo sa Barangay Prenza.
Ang barangay gipaubos sa yellow category tungod sa maong panghitabo sanglit giila gihapon kini sa Comelec nga election related nga insidente.
Mando ni Zorilla sa bag-ong hepe sa Balamban nga ipadayon ang mga programa nga nasugdan ni Hife ilabi na sa kampanya batok ilegal nga drugas.
Gawas niini kinahanglan nga palambuon pa ug hingusgan ang crime prevention sa maong lungsod.
