Mokabat sa 100 ka mga polis gikan sa Regional Mobile Force Battalion (RMFB) 7 ang gipadala sa Negros Oriental aron idugang sa pwersa sa maong probinsya subay sa pagpangandam sa seguridad sa Barangay and Sangguniang Kabataan Elections (BSKE) sa Oktubre.
Matod ni Police Lt. Col. Gerard Ace Pelare, spokesperson ni Police Brigadier General Anthony Aberin, nga way angay nga kabalak-an sa mga lumolupyo sa Negros Oriental sanglit dugang lang kini sa pwersa sa kapulisan ug sundalo sa maong lalawigan.
Ang ilang tahas sa pagkakaron mao ang pagbantay sa mga pantalan ug border control area nga maoy kamandoan ni Aberin.
Sa Biyernes sa hapon, Hulyo 7, 2023, gipahigayon ang send off ceremony sa Police Regional Office (PRO 7) parade ground dungan sa paghatag sa kamandoan ni Aberin.
Gipasabot ni Pelare nga gikinahanglan ang dugang personnel sa Probinsya sa Negros Oriental ilabi na nga nagkaduol na ang eleksyon sa barangay gawas sa presensya sa mga sundalo sa maong lugar.
Dako ang posibilidad nga modugang pa og padala ang PRO7 sa maong lalawigan kon gikinahanglan tungod kay dili gusto si Aberin nga magkuwang sila og polis kon magkaduol na ang piniliay.
Giangkon ni Pelare nga duna na silay giila nga mga barangay nga ipaubos sa areas of concern apan ila pang iduso ngadto sa Commission on Elections (Comelec) atol sa laing hugna sa Regional Joint Security Control Center meeting.
Subling gipahibawo ni Pelare nga madayon o sa dili ang barangay elections sa Negros Oriental, andam ang kapulisan sa paghatag og siguridad.
