TULO ka mananagat ang nasikop sa mga sakop sa Maritime Police nga gipangulohan ni Police Major Jose Los Baños human naaktohan nga nanguha og pawikan sa kadagatan sa Caohagan, Dakbayan sa Lapu-lapu alas 2 sa hapon, Sabado, Hulyo 6, 2019.
Ang mga nasikop mao silang Darami Radja, 50, Barayan Alim, 32, Julius Asamsa, 49, pulos taga Sitio Puntod, Barangay Mambaling, Dakbayan sa Sugbo.
Nagpahigayon og seaborne patrol ang Maritime Police uban ang Criminal Investigation and Detention Group Central Visayas sa kadagatan sa isla sa Olango. Nabantayan nila ang panagatan pipila ka metros ang gilay-on.
Ila kining giduol apan nabantayan nga aduna sila'y gidali paghulog sa dagat. Sa dihang niduol ang mga pulis, ilang nakita ang pawikan nga naglutaw nga aduna'y samad sa lawas ug patay na.
Nasakmit ang mga pana sa tulo nga mao'y ilang gigamit sa pagpatay sa pawikan.
Gisikop dayon ang tulo tungod sa pagpatay sa pawikan nga hugot nga ginadili sa balaod. (Supervoxpop Cebu)
