TULO ka lalaki ang sa prisohan na nangalag-kalag human masakmitan og gituohang shabu sa Sitio Mananga 2, Barangay Tabunok, Dakbayan sa Talisay Biyernes sa gabii, Nobyembre 1, 2019.
Ang mga dinakpan giila nga sila Mike Glenn Canillo, 33, Juvenson Alforque, 33, ug Ferdinand Galeos, 35.
Daling niresponde ang kapulisan sa Talisay City Police Station sa nadawat nga tawag sa usa ka concerned citizen nga, matud pa, naki-an ang tulo sa kadudahang lihok.
Naaktohan sa kapulisan ang tulo nga nagdala sa mga pinakete nga gituohan nga ginadiling drugas hinungdan nga sila giaresto.
Nakuha gikan sa tulo ang walo ka gagmay nga pinakete sa gituohang shabu.
Usa sa pagduda sa kapulisan nga gikan nipalit ang tulo aron unta sa himuong drug session una mobilar sa usa ka sementeryo sa Talisay.
Gisusi pa usab sa kapulisan kon dili ba buot nga ibaligya ang mga ilegal nga drugas.
Giimbestigahan pud kon anaa ba ang tulo sa drug watch list sa Talisay City Police Station.
Ang mga dinakpan natanggong sa Talisay Detention Cell ug didto na nangalag-kalag. Pasakaan ang tulo og kasong kalapasan sa Republic Act 9165 o ang Comprehensive Dangerous Drugs Act of 2002 Lunes, Nobiyembre 4. (FMD)