ASAWA nga wa na makaantos sa kapalahubog ug kanunay nga panag away nila sa iyang bana, iyang nadunggaban patay sa ilang balay sa sitio San Antonio, Barangay Guinsay, Siyudad sa Danao alas 5:25, Martes sa hapon, Hulyo 2.
Giingon nga kanunay na managmal ang bana ug apilon ang ilang 2-anyos nga anak babaye kon mahubog. Ang biktima giilang mao si Leo Durano 34, trabahante sa Republic Cement Factory sa siyudad.
Ang asawa nga niangkon nga iyang nadunggaban iyang bana mao si Mary Ann, 27, adunay duha ka pa ka tuig nga anak babaye.
Gikan si Leo sa silingan niining balay nag inom sa iyang mga barkada.
Pag-uli sa ilang balay, hubog na si Leo nga maoy sinugdanan sa ilang away sa asawa.
Taliwala sa ilang panag-away, mikuha si Mary Ann og kutsilyo sa kusina nga gibana-bana sa kapulisan nga adunay gitas-on nga 3-4 inches ug nihasmag ug nidunggab sa tuo nga dughan sa iyang bana.
Gihulagway sa kapulisan nga hait kaayo ang kutsilyo nga maoy kanunay nga gamiton sa paghiwa sa karne nga ilang lutuon sa kusina.
Matod ni Police Lieutenant Jasper Reyes sa Danao City police station nga makausa ra ka higayon nga gidunggab sa asawa ang iyang bana.
Patay kini diha-diha dayon human maigo ang atay.
Saysay ni Mary Ann sa mga imbestigador nga kon mahubog ang iyang bana, dapatan niini ang ilang anak nga duha pa ka tuig.
Tungod kay napuno na ang asawa, gidunggab niya kini.
"Galalis pa kuno ni pag una sa iyang bana. Ang banag asawa nag lalislalis pa sila unya nahitabo nga ang estorya sa asawa nga napuno na kuno siya, posibli nga before ato nga lalis naa na siguro silay bikil kay nagsige naman lang ni silag away," matod ni Reyes.
Gawas nga managmal kini sa asawa, apilon matod pa sa pagpasakit ang ilang duha pa ka tuig nga anak babaye.
Tungod sa kanunay nga pagpasakit sa bana ug ilakip pa ang ilang anak, nawala kini sa kaugalingon.
Kasong parricide ang giandam sa Danao City police station kang Mary Ann ug andam matod pa kini niyang dawaton.
Nakuha usab sa mga imbestigador ang kutsilyo nga gigamit sa pag dunggab nga nabulit na sa dugo.
Gikustodiya pa sa mga kabanay ang 2 anyos nga anak sa magtiayon samtang naa pa sa bilanggoan ang inahan niini.
