GIDEKLARAR sa Metropolitan Cebu Water District (MCWD) nga hingpit nang nahubas ang Buhisan Dam, buot ipasabot nga wala na kini tubig nga ika-supply.
Moabot ngadto sa 6,000 ka mga panimalay sa konsumidor sa MCWDang direktang maapektohan niini.
Niadtong Lunes, Marso 25, dihang hingpit na nga niubos pa sa discharge pipe ang nahabiling tubig sa Buhisan dam.
Ang pagkahubas, subay gihapon kini sa nagkagrabeng init sa panahon nunot ning weak El Niño phenomenon.
Matod sa tigpamaba sa MCWD Charmaine Rodriguez-Kara nga direktang apektado niini ang sakaon nga bahin sa Banawa, Horseshoe Drive, Capitol Site, Oppra, Ipil-Ipil, Camputhaw, Clavano, Sambag 1, Sambag 2, F. Ramos. B. Rodriguez, Juana Osmeña, Pier Area, North Reclamation Area, ug MJ Cuenco Ave. M. Velez.
Anaa lang sa 3% ang bahin sa Buhisan dam sa kinatibuk-an nga supply sa MCWD matag adlaw diin anaa kini sa 238,000 cubic meters.
Gibutyag usab niini nga wa pa gani magsugod ang El Niño, apan ila na kining gipreparahan.
Pasabot ni Kara nga ila ra king hapsayon ang pag-apud-apod sa supply sa tanang 191,000 ka konsumidor sa walo ka local government units (LGUs) sa Metro Cebu.
Anaa sa 6,000 cu.m. ang normal nga ma-supply sa Buhisan Dam sa panahon nga wala pa nagnihit ang tubig.
Usa sa gihimo karon sa MCWD mao ang pagsupply sa direkta nga apektado nga dapit nga gikan sa mga atabay sa Talamban.
Sa pagkakaron anaa nalang usab sa 19,000 cu. m. ang produksyon sa Jaclupan dam gikan sa 33,000 cu.m., sa normal nga lebel sa panahon.
Gipanglantawan usab nga karong semanaha moabot na sa kritikal nga lebel ang Jaclupan dam o katunga kini sa normal kun 17,000 cu.m.
Sa kinatibuk-an nga supply sa tubig sa MCWD, 70% niini gikan sa ground water o kining mga atabay, 26% gikan sa surface water o sa mga dam ug ang nahabiling 4% desalinated water.
Gawas sa pagrasyon sa supply sa tubig, usa ning pagpangita og laing mga atabay nga mamahimong maka-supply sa MCWD nga ilahang sulbad sa nagkaubos nga supply sa tubig.
Aduna usa'y 44 ka service areas nga wala nila tuguti sa pagbukas og aplikasyon sa tubig. Tambag sa MCWD sa publiko hilabi na sa mga konsumidor niini nga magkat-on kini og pundo aron adunay magamit.