SUGOD sa Lunes, Marso 22, 2021 sirad-an na gikan sa mga pribadong sakyanan ug motorsiklo ang Carbon public market isip pagpangandam sa Semana Santa.
Tumong niini aron malikayan ang nahitabo niadtong 2020 nga nagdasok ang mga tawo aron mamalit og sagol sa binignit.
Atol sa pag-inspeksyon sa Carbon market ni Police Colonel Josefino Ligan, hepe sa Cebu City Police Office, iyang nabantayan nga gubot ang sitwasyon sa merkado sanglit nagdasok ang mga tawo tungod sa mga sakyanan nga moagi sa mga dalan.
Tungod niini, nipatawag og meeting si Ligan kagahapon, Marso 17, 2021 uban sa mga opisyal sa Prevention, Restoration, Order, Beautification and Enhancement (Probe) team, Cebu City Transportation Office (CCTO), Market Operation Division ug hepe sa Carbon police station aron planohan unsay angay nga buhaton.
Ilang nasabotan nga sugod sa Lunes, Marso 22, sirad-an na sa mga motorista ang mga dalan sa Carbon public market sa mga pribadong sakyanan ug motorsiklo.
Gitugotan lang nga makasulod mao ang mga delivery truck nga magkarga og utanon ug mga paninda sa merkado.
"Ang makasulod ra sa Carbon market ang mga delivery trucks para mopanaog sa ilang mga goods nga igtitinda. Kay sa pag-conduct namog ocular inspection, gubot ang sulod sa Carbon Public Market. Naay traffic sa pedestrian, naa puy traffic sa sakyanan," matod ni Ligan.
Ang pagpasira aduna nay pagtugot ni Mayor Edgardo Labella.
Ang mga dalan nga sirad-an sugod Marso 22 mao ang Kawit, El Filibusterismo, Calderon, Plaridel ug F. Gonzales samtang ang mga sakyanan moagi sa merkado, i-reroute sa Escaño Street duol sa dalan Magallanes, ug mogawas sa MC. Briones Street padulong na sa Senior Citizens' Park.
Magbutang usab sila og 36 ka mga pulis gikan sa Carbon police station inabagan usab sa Cebu City Police Office headquarters. Moabag ang Task Force Kasaligan, mga sakop sa Probe team ug City Environmental Sanitation and Enforcement Team (Ceset).
Sila ang istriktong mopatuman sa health protocol ug mosikop sa wa magsul-ob og mask ug wala motuman sa social distancing. Dunay ibutang nga duha ka "bust bus" nga gipahimutang sa mga dalang MC. Briones ug Escaño.
Sugod usab karong adlawa, Marso 18, ang CCTO mopahigayon og clearing operation sa mga karsada duol sa Carbon Public Market.
Kadtong mga sakyanan nga nang-park daplin sa dalan ilang ipangkarga sa ilang towing truck ug ibutang sa impounding area.
Labi na ang mga sakyanan nga gipanag iya sa mga tindahan nga nangadunot na nga gibutang lang sa sidewalk ilang birahon ug dalhon sa impounding area.
Matod ni Edwin Navales, operations chief sa CCTO, nga tungod kay di na mahimong pasudlan sa mga pribadong sakyanan ang Carbon Public Market, mahimong maka-park ang mga mamalitay sa Compania Maritima nga nahimutang sa South Road Properties (SRP) nga way bayad ug kilid sa La Nueva aron di ma clamp ang ilang mga sakyanan.
Mibahad ang pangulo sa Probe team nga si Raquel Arce nga ila nga estriktong ipatuman ang quarantine protocol ilabi sa mga menor de edad nga naa namuyo sa sitio Bato, Barangay Ermita nga duol lang sa Carbon.
"Sugod sa Lunes hugtanon nato nga ipatuman ang mga quarantine protocols diha. So, atong abisohan ang atong mga residente sa Ermita, especially diri sa Bato ang stay at home policy kon minor, 15 years below. Dili gyud pwede kay usahay ra ba maanad sila nga ang ilang himuong playground ang karsada," matod ni Arce.