Dalaga nga giingong nasakpan sa akto nga nanguot og pitaka sa usa ka kustomer ala 1:00 sa hapon sa Dominggo sa Brgy. Central Poblacion, dakbayan sa Naga nabilanggo.
Ang suspek giilang si Ailen Rosco, 37, taga Brgy. Tabunok, samtang ang biktima giilang si Cirillo Salili, 35, minyo, taga Brgy. Tuyan, dakbayan sa Naga.
Si Police Staff Sgt. Ariel Yap, sa Naga City Police station nga nahinabi sa Supervoxpop Cebu sa Dominggo sa hapon, nagkanayon ang mga trabahante sa usa ka sari-sari store maoy nakadakop sa suspek.
Ang suspek nakakuha sa pitaka sa biktima human giigong gikuot ang iyang bag samtang nangumpra.
Matod pa ni Yap nga alerto ang tagdumala sa sari-sari store kay naigo na sila sa mga kawatan nga nagpakaron-ingnon nga mangumpra.
Gimonitor nila sa CCTV ang tanang nangumpra ug nasakpan sa akto ang dalaga.
Nasuta sa ilang CCTV nga ang suspek nakaigo na ka usa sa samang tindahan.
Nabawi ang pitaka sa biktima nga dunay P3,000 nga cash.
Karong adlawa, Lunes, ipasaka ang kasong pagpangawat batok sa suspek. / GPL
