NAHUKMAN nga guilty ang managsuon nga Andal Jr., Anwar ug Zaldy Ampatuan ingon man ang lain pang lima ka mga miyembero sa gamhanang pamilyang Ampatuan sa 43 ka mga kasong murder nga may kalabot sa 2009 Maguindanao massacre.
Ang matag usa gisentensyahan og reclusion perpetua nga way piyansa ug parole.
Ang laing lima ka mga miyembro sa Ampatuan nga sad-anmao silang Datu Anwar Sajid "Datu Ulo" Ampatuan, Datu Anwar "Datu Ipi" Ampatuan Jr., Manny Ampatuan, Mohades Ampatuan ug si Misuari Ampatuan.
Lain usab ka 20 ka mga akusado nakombikto ug nasentensyahan pareha sa mga Amputan ngadto sa 40 ka tuig sa prisohan nga way parole.
Ang laing 28 ka mga suspek gimandoan nga mobayad og danyos nga anaa sa P155.594 millon ngadto sa mga pamilya sa mga biktima.
Ang laing 15 ka mga akusado, apil na ang 14 ka mga pulis, kombiktado usab kay nahimong accessories sa krimen.
Sila gisentisyahan ngadto sa minimum nga unom ka tuig sa koreksyonal ug ngadto sa 10 ka tuig ang kinatas-an ug walo ka buwan nga prision mayor.
Si Quezon City Regional Trial Court Branch 221 Judge Solis Reyes nipakanaug sa hukom niadtong Disyembre 19, 2019 nga nasuwat sa 761 ka pahina nga desisyon sa kaso, diin 10 na katuig sukad nahitabo.
Ang masaker gihulagway nga usa sa mga "deadliest" nga pag-atake sa mga tigbalita.
Sa mao nga hitabo, 32 ka mga journalist ang apil sa gipatay ug gilubong sa mabaw nga mass grave. Human sa pagtawag sa mga ngalan, ang mga suspek wa nitago sa ilang kasagmuyo sa resulta.
Nakalingkawas
Sa laing bahin, 56 ka mga tawo ang nalipay ug naggaksanay sa usag-usa human sila na-absuwelto.
Apil sa mga na-absuwelto mao ang upat ka mga miyembro sa pamilyang Ampatuan ug 27 ka mga pulis.
Ang korte nimando usab sa ilang daling kagawasan gikan sa bilanggoan.
Ang upat ka mga mga Ampatuan nga na-absuwelto mao sila si Akmad, Sajid Islam, Jonathan ug si Jimmy.
Ang mga saksi niingon nga si Sajid Islam – kinsa mao ang mayor karon sa Shariff Saydona Mustapha sa Maguindanao, wa niapil sa paglaraw sa pagpatay
Ang maanindot ra nga bahin sa 761 nga pahina sa ruling ang gibasa sa korte sa alas 11:30 sa kabuntagon, Disyembre 19, 2019 human nalangan og sobra sa duha ka oras.
Ang mga abogado sa Ampatuan niingon nga moapelar sila sulod sa 15 ka adlaw.
Anaa sa 197 ka mga indibidwal ang nakasohan og multiple murder human sa pagpatay sa 58 ka mga tawo, apil na ang 32 ka mga tigbalita niadtong Nobyembre 23, 2009.
Sa 197 ka mga suspek, 117 niini ang nasikop. 80 ang giisyuhan og warrants of arrest sa korte. (JCT)