SIYAM ka oras human nipahibawo si Ginatilan Mayor Dean Michael Singco nga siya nagpositibo sa coronavirus disease 2019 (Covid-19), subo nga gipahibaw usab ni Oslob Mayor Jose "Jun" Tumulak nga wa siya makalikay sa pagtakboy sa sakit.
"Bisan sa ka estrikto nato sa pagsubay sa mga protocols kabahin niining Covid-19, dili nato malikayan nga kita matakdan, kay usa sa tanan, ang maong sakit dili nato makit-an," matod ni Tumulak sa Pebrero 17 nga Facebook post.
Matod ni Tumulak nga tungod sa padayon nga mga kalihukan nga gitambungan ug iyang gibuhat ang tanan bisan pa sa nasinating pandemya, di malikayan nga mataptan sa sakit
"Dili exempted sa maong sakit. Tungod sa kadaghang aktibidadis nga atong gitambungan sa pagpanerbisyo. Positive ko sa Covid-19," dugang ni Tumulak.
Wala na modetalye pa si Tumulak kon asa ug unsay kahimtang niini.
Gipasalig hinuon sa mayor nga padayon nga bukas ang opisina ug munisipyo alang sa pag serbisyo sa mga residente nga nagkinahanglan. (ANV)