ENGLISH teacher sa usa ka unibersidad sa Siyudad sa Sugbo gidakop sa mga pulis sa Parian Police Station sa Cebu City Police Office human naaktohan nga nakig-oral sex sa iyang 17 anyos nga estudyante sulod sa usa ka lodge sa dalan Colon.
Ang tinun-an giingong nisumbong sa iyang amahan nga gihulga siya sa maestro nga hagbungon kon di makighilawas kaniya.
Ang magtutudlo kinsa nabilanggo ug pasakaan na og kaso wa lang una nganli ning mantalaan kay wa pa makuhai sa iyang habig, nagpangidaron pag 24 anyos.
Ang ngan sa unibersidad gipugngan usab una ning mantalaan samtang gihuwat pa ang ilang pamahayag sa hitabo.
Matod ni Police Captain Armando Labora, hepe sa Parian Police, sa Lunes, Abril 22, sa alas 9 sa buntag, ang amahan sa tinun-an nireklamo sa ilang buhatan human masayod nga gidala ang iyang anak sa maestro sulod sa lodge.
Dali nga niresponde ang mga pulis uban ang amahan sa tinun-an.
Sa sulod sa usa sa mga kwarto sa lodge, ilang naabtan ang maestro nga nakighilawas sa iyang senior high school nga estudyante.
Matod sa tinun-an sa imbestigasyon sa kapulisan nga gihadlok siya sa iyang maestro nga hagbongon sa English subject kon di siya makighilawas bugti sa grado.
Natingala ang amahan nganong gihulga ang iyang anak nga hagbungon nga wa man kini problema sa klase.
Nagduda siya nga nakagusto ang maestro sa iyang anak tungod kay arangan kinig panagway.
"Ang ingon sa maestro nga hagbungon siya kon dili siya makig-perform sa iyang gusto nga mag sex sila," matod ni Labora.
Human sa pagpanghulga, gitug-an niya kini sa iyang amahan hinungdan nga gi-set-up nila ang maestro pinaagi sa pagsanong kon asa sila mag-abot sa tinun-an.
"Nag check-in gyud didto sa lodge nga duol ra pud aning among police station. So, didto nakit-an gyud nato nga nag sex ang duha," matod ni Labora sa Supervoxpop Cebu.
Gipusasan gilayon sa mga pulis ang magtutudlo ug gibalhog na sa Parian detention cell.
Giandam na ang kasong kalapasan Republic Act 7877 o Anti-Sexual Harassment Act of 1995 ug child abuse tungod kay menor de edad pa ang biktima.
