Magpadayon ang "arkabala" system kun inadlaw nga pagbayad sa abangan sa matag stall kon mahuman na ang pagtrabaho sa modernong merkado publiko sa Carbon.
Padayong barato ug di umentuhan ang abangan sa mosunod nga tulo ka mga tuig kon magsugod na sila sa paggamit sa bag-ong pasilidad.
Mao kini ang gipaneguro ni Cristina Angan, head of commercial sa Carbon Redevelopment Project sa Megawide Construction Corporation, ngadto sa mga manindahay sa ilang padayong konsultasyon, di lang ngadto sa mga organisasyon, kon di ngadto sa tagsa ka sakop ug unit.
Apan nakugang si Angan kay mas nangabalaka ang mga manindahay kon unsaon pagpalambo ang nagbarog nga mga pasilidad, inay ang ilang abangan.
Ang abangan karon naa sa P8.50 matag metro kwadrado matag adlaw, labing ubos sa nasod ug usa sa mga barato sa Metro Cebu.
Sa nakalabay nga duha ka mga tuig nagpahigayon ang Megawide og konsultasyon tali sa stakeholders kalabot sa joint venture sa kompaniya ug sa Siyudad sa Sugbo sa di pa ang groundbreaking sa proyekto.
Ang labing uwahi nga konsultasyon gipahigayon niadtong Marso 2-4, 2021 nga gitambayayungan sa Cebu City Market Operations Division.
Ilang nasayran nga ang ganahan sa mga vendor mao ang kabarato sa abangan ug presyo sa baligya ug kadaghan sa mga produktong mabaligya nga way oras nga gitakda.
Sa ilang konsultasyon, gipaneguro ni Angan nga magpabilin nga barato ang abangan ug subli nilang giklaro nga kon unsa may ipatuman nga bayranan, ibase kini sa Market Code sa Siyudad ug aprobahan pa sa Konseho.
"Vendors and regular stall holders should not worry about rates because they will be based on the Market Code, approved by the Council and more importantly, upon consultation of Vendor Leaders. As to ambulant vendors, the current arkabala" system will still be followed,"matod ni Angan.
Subli usab nilang giklaro, labina taliwa sa kabalaka sa mga manindahay, nga ang merkado sa Carbon pabilin nga iyaha sa Kagamhanan sa Siyudad kay ang proyekto usa ka public-private partnership, busa ang pagpalambo, apil na ang merkado, magpabiling iya sa Cebu City.
Mobubo ang Megawide og P5.5 billion alang sa phase one ug mobayad matag tuig ngadto sa Siyudad.
Ila usab nga gipaneguro way bisan usa ka manindahay ang mahawa gikan sa merkado publiko.
Matod ni Angan nga duna silay listahan sa tanang mga manindahay gikan sa MOD, lakip na sa ambulant vendors, nga mahatagan og pwesto matag usa.
"We have accounted for the number of vendors based on the official list of the Market Operations Division, including ambulant vendors. They will all have space in the upgraded facility – no vendors will be displaced. The building is also designed to maximize foot traffic in all areas to evenly drive customer traffic in all locations," duganga ni Angan.
Gipasabot usab sa MOD ug Megawide nga ang mga manindahay sa Warwick Barracks ug Freedom Park ang unang ipangbalhin sa temporaryong pasilidad sa 4th quarter ning tuiga.
Kon mahuman na pagpahimutang ang tanang vendors, magsugod na usab ang pagtukod sa permanenteng pasilidad sa merkado ug mahuman sud sa duha ka mga tuig.
Ang groundbreaking sa bag-ong merkado giuswag gikan sa Marso 17 ngadto sa sunod semana. (REV gikan sa PR)