BALAY sa mayor ug bise mayor sa lungsod sa San Francisco, isla sa Camotes gironda sa mga sakop sa Provincial Intelligence Branch (PIB) ug Provincial Drug Enforcement Unit (PDEU) sa Cebu Provincial Police Office nunot sa paghupot og mga armas nga way lisensya.
Ang kapulisan nagbitbit sa search warrant nga giluwatan ni Judge Leopoldo Cañeta sa Regional Trial Court (RTC) Branch 10 sa lungsod sa Barili batok nilang Mayor Aly Arquillano ug Vice Mayor Alfredo Arquillano Jr. nga nagpuyo sa Barangay Poblacion sa maong lungsod.
Nakuha gikan sa ilang balay ang .45 kalibre nga pistola, .22 caliber rifle ug magazine niini ug usa ka AR 15 rifle nga expired na ang mga lisensya, usa ka granada ug mga bala sa kalibre .45 ug 9mm pistol.
Matod ni Police Captain Alejandro Batobalonos, hepe sa PDEU, nga nakadawat silag report nga ang magsuong Arquillano adunay armadong grupo nga giumol sa maong lungsod.
Gani nabaniog sa ilang lungsod aduna kini gibuhi nga mga hitman, apan wa lang madakpi.
Tungod sa maong impormasyon, ila kining gisusi sa Firearms Explosives Office 7.
Dinhi ilang nasuta nga adunay nakarehistro sa ilang ngalan nga mga armas, apan wa na ma-renew.
"Naa mi information nga naa ni kuyogkuyog nga armed person. So, magluklok pud sila. So, among gi verify sa Crame kon naa ba silay licensed firearms. Mao to nga naa siyay expired nga .22 (caliber) rifle," matod ni Batobalonos sa Supervoxpop Cebu.
IYAHA
Giangkon hinuon ni Mayor Arquillano nga iya ang armas nga kalibre .22 rifle apan wa siya masayod nga naa ra diay sa laing kwarto sa ilang balay.
Matod niya nga iya na kining na report sa police station nga nawagtang ug nakuhaan na niyag affidavit of loss.
Apan wala niya angkona ang granada nga nakuha sa sulod sa iyang kwarto kay wa siya magtinil niini kay mahadlok siya nga mobuto.
"Wala man koy granada, mobuto pa lang na. Kahibawo ang taga San Fran kon unsa mi diha. Milambo ang lungsod sa tinud-anay namo nga panerbisyo. Hinaot nga padayon sila nga mosuporta namo," matod ni Mayor Arquillano.
Samtang si Bise Mayor Alfredo Arquillano jr niangkon nga iyaha ang kalibre .45 nga pistola, apan iya na kining gi turnover sa tresurero sa lungsod human mi expire ang lisensya niini.
Nagtuo ang magsuong mayor ug bise mayor nga adunay nagpaluyo sa ilang pagkasikop.
Pulos sila last termer sa ilang tagsa-tagsa ka posisyon.
Ning nagsingabot nga eleksyon nagbaylo sila diin si Aly modagan sa pagka bise mayor samtang si Alfredo sa pagka mayor ubos sa partido Bakud.
Apan gihimakak ni Batobalonos nga adunay bahid sa politika ang ilang pagdakop sa magsuong Arquillano.
Kasong kalapasan sa Republic Act 10591 kun illegal possession of firearms and ammunition ug illegal possession of explosive ang ipasaka sa kapulisan batok sa magsuong mayor ug bise mayor nga way gitugot nga pyansa.
PULITIKA?
Nagtuo ang Barug Alang sa Kauswagan ug Demokrasya (Bakud) Party nga dunay bulok pulitika ang pagkasikop sa managsuong Arquillano.
"We believe these are politically motivated to try and create a handicap on the support that the 5th district is giving the Magpale-Davide candidacy. This unfortunate incident will not prevent or diminish the support of our allies. It will further strengthen and solidify our alliances," sumala ni Joseph Felix Mari "Ace" Durano, presidente sa Bakud, sa pamahayag nga gipadala ngadto sa mga sakop sa media pipila ka oras human masikop ang managsuong mga opisyal niadtong Huwebes, Abril 4.
Si Bise Gobernador Agnes Magpale maoy gubernatorial candidate sa Bakud samtang ang running mate niini nga si Gobernador Hilario Davide III sa Liberal Party, ang gipaluyohan usab sa partido.
Sumala ni Durano ang mga dagko sa ilang partido ang gi-target tungod sa ilang pagsuporta sa panagpares nila ni Magpale ug Davide.
Matod niya, ang ilang mga abogado ang nitabang nila ni Mayor Aly ug Vice Mayor Al aron maseguro nga dili malapas ang ilang mga katungod.
"Our lawyers are doing the necessary documentation to address the charges," dugang ni Durano.