Gumikan sa pag-usbaw sa kaso sa Covid-19 sa Dakbayan sa Sugbo, ang Archdiocese sa Sugbo nagpahibawo niadtong Hulyo 6, 2021, nga suspensuhon ang mga misa diha sa kapilya sa siyudad.
Naglakip na sa nobena, piyesta, ug binuwan nga misa sulod sa ning buwan sa Hulyo.
Base sa pahibawo nga giluwatan sa buhatan ni Monsignor Renato Beltran, chancellor sa Archdiocese nga ang maong kalambuan nasabutan human sa usa ka coordination meeting uban ang Cebu City Emergency Operations Center.
Matod ni Fr. Jonathan Rubin sa Archdiocese of Cebu nga ang mga gipasabot nga kapilya mao naglakip sa kapilya sa parokya, barangay ug sityos diin lisod mapatuman ang safety protocol.
Apan giklaro nga exempted ang Carmelite Monastery nga usa ka autonomous chapel alang sa mga Carmelite nga madre sa kondisyon nga mapatuman gihapon ang minimum health protocols.
Si Monsignor Joseph Tan, tigpamaba sa Archdiocese of Cebu, nagkanayon nga ang mga Carmelite nuns nagpahibawo hinuon sa pinaagi sa ilang Facebook page nga nag-awhag sa katawhan nga mosalmot sa mga novena masses ug uban pang kalihukan pinaagi sa online.
Matod sa Archdiocese nga kini usa sa mga dakong kausaban sa mga liturhikal gumikan sa gipatuman nga health protocols nga ipatuman na unya sa mga parokya dinhi sa Syudad sa Sugbo.
Ang Siyudad sa Sugbo adunay 482 ka mga bag-ong kaso sa Covid-19 sulod sa pito ka adlaw gikan Hunyo 29 hangtod Hulyo 5, base sa talaan sa Department of Health
Kining 29 ka dugang nga mga kaso nga natala sa Siyudad niadtong Lunes, nakapahimo sa iyang total cases ngadto sa 25,971; anaa sa 24,195 ang gi-tag nga recovered; 881 ang namatay, ug 895 ang nagpabilin nga aktibo nga mga kaso.
Niadtong Hunyo 5, ang Cebu City aduna lamang 538 ka mga active cases.
Matod usab sa taho sa Visayas Covid-19 Vaccination Operations Center nga 7.19 porsento pa ang total eligible population sa dakbayan ang fully vaccinated na.
Anaa sa 18.40 porsyento sa total eligible population ang nakadawat na sa ilang first dose sa Covid-19 vaccine.
Sa susamang kalambuan, ang Cebu City Police Office mihangop sa lakang nga gihimo sa Archdiocesan sa Sugbo sa pagsuspenso sa mga religious activities diha sa mga kapilya.
Matod ni Police Lieutenant Colonel Wilbert Parilla, deputy city director for operation sa CCPO, nga adunay mga police sa barangay lakip na ang task force kasaligan ang mobantay sa mga kapilya.
Makig-alayon usab ang CCPO sa mga barangay official nga sila na mismo usab ang mohimog lakang o mobantay nga idili ang mga kalihukan sa kapilya sa ilang dapit.
Pasabot ni Parilla nga adunay kamandoan si President Rodrigo Duterte ngadto sa kapulisan nga pasakaan og kaso ang mga barangay kapitan nga dili makabadlong sa tapok-tapok sa ilang dapit.
"We will coordinate sa mga barangay officials considering also nga naay standing order ang presidente nga kung kinsa tong mga mag tapok-tapok nga dili mabadlong sa atoang mga barangay officials, they will be charged. So ato ning ipuno sa pag coordinate sa atoang mga barangay officials nga sila sad mismo mo tabang pag monitor within their respective barangay," saysay ni Parilla.
Nahisgutan usab sa tigum sa kadagkoan sa Simbahang Katoliko sa Sugbo ang pag-limit usab sa misa sa patay diha sa mga punerarya diin maka usa lang ka higayon kini himuon.
Matod ni Parilla nga makig-alayon una sila sa emergency operation center EOC aron makahatag kini og lagda alang sa misa sa patay.
Dugang ni Parilla nga ning pagsaka sa kaso sa Covid sa dakbayan makigtagbo sila sa kadagkoan sa E0C aron masayran asa na usab ang paspas nga tinakdanay aron didto usab nila ipakatap ang mga police.
