SAN Isidro, Leyte - Patay ang municipal administrator ning lungsod human gipusil sa may gas station duol sa balay sa mayor pasado alas 7 sa buntag, Miyerkules, Mayo 8.
Giila ang biktima nga si Levi Mabini, 42, taga Barangay Daja Dako ning lungsod.
Duha naman ang naangol sa pagpamusil.
Base sa imbestigasyon sa kapulisan, nibiya si Mabini sa ilang balay sa Barangay Crossing sakay sa usa ka motorsiklo nga gimaneho ni Remart Delima.
Niuban usab ang usa ka ginganlan og Joseph Misa ug Alan Amen, kinsa sakay sa laing motorsiklo.
Ang upat ningpadulong sa balay ni San Isidro Mayor Susan Ang sa Barangay Capiñahan.
Pag abot sa biktima sa gasolinahan nga iya sa mayor, kalit nga miabot ang usa ka Ford Ranger nga gray, kang plate number wa mabantayi.
Gisugdan sa pagpamusil ang mga biktima diin nahagba si Mabini samtang nanghapa ang iyang mga kauban.
Gawas kang Mabini, nakahimo sa pagsud sa balay sa mayor ang iyang tulo ka mga kauban.
Nakaangkon og mga samad pinusilan sa iyang lawas si Mabini
Usa ka 19 anyos usab nga si Jea Itang naigo sa bala sa iyang tiil samtang si Misa naigo sa tuo nga paa.
Dali nga nisibat sa wa mahibaw-i nga direksyon ang mga killer. Gideklara nga patay na si Mabini ni Dr. Frederick Sison sa crime scene.
Nakuha gikan sa crime scene ang upat ka mga basiyo sa M16 rifle, usa ka basiyo sa kalibre 9mm nga pistola ug usa ka bala sa kalibre .45 nga pistola.
