Lalaki nasikop tungod sa giingong pagpangawat og alahas sa usa ka panimalay sa Barangay Tangke, dakbayan sa Naga, nga mokantidad og P120,000.
Ang suspek giila nga si Cresente Deiparine, 33, adunay live-in partner, lumad nga taga Barangay Tangke, dakbayan sa Naga.
Ang biktima mao si Pacifico Relacion, 58, taga Purok Snowdrop, Barangay Linao, dakbayan sa Talisay, may live-in partner nga igsuon ni Deiparine.
Si Police Master Sergeant Jake Catane sa Naga City Police Station nga nahinabi sa Supervoxpop Cebu nagkanayon nga ang biktima nitambong og piyesta sa balay sa iyang live-in partner niadtong Martes, Oktubre 10, 2023.
Gikataho’ng gipatagoan ni Relacion ang gidala-dala nga bag nga adunay sulod nga mga alahas nga nagkantidad og P120,000 ug gipasulod sa aparador sa tagbalay.
Gikataho’ng gilungkab ni Deiparine ang aparador dayon kuha sa maong butang.
Nasuta sa biktima nga nawala na ang iyang bag nga gisudlan sa mga alahas sa dihang iyang gisusi ang kabinet sa pagka alas 3:00 sa hapon.
Si Relacion nitaho dayon sa kapulisan, dayon gihimo ang follow-up operation ug nasikop ang suspek mga alas 8:00 sa gabii.
Narekober sa kapulisan ang mga kinawat nga butang, lakip ang resibo sa pawnshop sa usa ka kwintas nga adunay cross pendant, nga gikataho’ng giprenda sa suspek.
